DILG, nangiparuar iti advisory maipapan ken Bagyo Ramil

SAN FERNANDO CITY – Gapu iti nakaro a namsaakan ni Bagyo Pepeng ditoy deppaar ti amianan a pakairamanan ti probinsia ti Ilocos Sur, nangiparuar ti Department of Interior and Local Government iti advisory tapno masaganaan dagiti umili ti idadateng ni Bagyo Ramil iti Amianan a Luzon.

Iti advisory, dinakamat ni Manuel Biason, regional director ti DILG Region 1, ti pannakaisagana ken pannakaaramat kadagiti amin a fire trucks kadagiti estasion ti Bureau of Fire Protection iti rehion tapno mapaguni ti sirena ken megaphones para iti pannakaballaag dagiti umili mainaig iti panagpeggadda iti iduduprak ti bagyo.

Daytoy ket no basnotan ni Ramil ti Northern ken Central Luzon,” kinuna ni Biason.

Inyunay-anay pay ti opisial ti panaka-activate ken pannaka-mobilize dagiti local disaster coordinating councils a tumulong iti pannakaibakuit kadagiti agindeg nga adda iti asideg ti karayan, wenno kadagiti malaylayus a lugar tapno maiyadayoda iti peggad.

Malaksid iti daytoy, impalagip pay ni Biason dagiti sumaganad kas panangsagana no dumteng ti bagyo: siguraduen a natibker ti balay iti iduduprak ti napigsa nga angin ken layus; panagmonitor iti radio kadagiti kabaruanan a damag mainaig iti bagyo; panagtalinaed iti balay tapno makaliklik kadagiti agtuang a poste, kayo ken mapugsat a barut ti elektrisidad; pannakaisara dagiti tawa ken ruangan; panangisagana iti bateria, posporo, kandela ken flashlight a madadaan nga aramaten no kellaat nga agawan ti koriente, naan-anay a taraon, danum ken agas ken kaadda iti sultip tapno adda maaramat a pangawag wenno pagpaarayat no makubong wenno di makapanaw iti balay; ken panagkararag tapno maispal iti peggad bayat ti idadalapus ti bagyo.#