Footer

District hospital, immawat iti ag-agas

NARVACAN, Ilocos Sur – Inyawat ni Gov. Deogracias Victor “DV” Savellano ti agduduma nga agas, dextrose ken dadduma pay a kasapulan iti ospital nga agpateg iti P250,000 bayat ti ibibisita ti gobernador iti Central Ilocos Sur District Hospital itoy nga ili idi Hulio 30.

Kinuna ni Dr. PabloQuedado, OIC ti nasao nga ospital, a mausar dagiti agas ken ramit para kadagiti pasiente ti ospital.

Binisita pay ti gobernador ti kanayonan a pasdek ti ospital a madama a mabangbangon babaen ti panangpondo ti Department of Health. Manamnama a malpas ti konstruksion ti innem ti kuartona a pasdek kalpasan ti dua a bulan. Mausarto dagiti kuarto kas Philhealth rooms kalpasan a naikkan ti CISDH iti Philhealth accreditation.

Kabayatanna, inturn-over ni Lilia Aquino, Presidente ti Rotary Club Narvacan dagiti baro a ramit ti ospital ken sumagmamano a baro a gamigam a napasimpa ken napaadda babaen ti counterparting scheme.

Nangted ti gobierno probinsial iti P600,000 idinto a binagi ti Rotary Club of Narvacan ken Worldwide Narvacanean ti P500,000 a nausar iti proyekto a mangpasayaat iti serbisio ti ospital kadagiti napanglaw a pasiente.#