Footer

Doblienmi ti tured a makirupak iti illegal a droga: PDEA Asec

SAN FERNANDO CITY – Kinuna ti assistant secretary ti Philippine Drug Enforcement Agency (PDEA) nga iti sanguanan ti peggad a sangsanguenda, kasapulan a doblienda ti turedda iti pannakirupakda iti panagraira ti droga tapno maparmek daytoy a kabusor ti kagimongan.

Imbatad daytoy ni PDEA Assistant Secretary Rodolfo Caisip bayat ti interbiona iti maysa a lokal a radio station ditoy mainaig iti pannakapapatay ti maysa a PDEA agent ken ti anakna iti Barangay Darapidap, Candon City itay nabiit.

Kinondena ni Caisip ti nasao a pammapatay idinto nga imbatadna a dakkel a pukaw ti pannakatay ti kaduada iti PDEA agsipud ta mapagtalkan daytoy kas hepe ti monitoring division ti ahensiada.

Napapatay iiti pasado alas 7:00 iti sardam ti Pebrero 12 ni Edward Gautani, Sr., 40, ken nasugatan ti anakna a ni Edward, Jr., 16, baro, high school student, bayat ti panangrabiida iti resort-houseda iti Barangay Darapidap.

Iti inisial nga inbestigasion dagiti polis, mangmangan dagiti biktima idi dua a lalaki ti nag-order iti serbesa iti tiendada.

Kabayatan a mangal-ala ni Virgie del Rosario iti beer, maysa ti nangpaltog iti laklakay a Gautani iti namindua a daras.

Mapapati nga iti baet dagiti sugatna, pinadas ni Gautani, Sr. ti tumaray ket inarayat ti anakna ngem insaruno dagiti lallaki a pinaltogan ti baro.

Saanen a naidanon iti ospital ti biag da Edward Gautani gapu kadagiti linak-amna a sugat a gapuanan iti caliber .45 ken 9 mm pistol. Nagsagrap met ni Gautani, Jr., iti sugat iti ulo.

Nakarekobre dagiti polis iti nakapasamakan ti krimen iti 6 a kapsula manipud iti cal. 45, maysa a bala ti cal. 45, 4 a napitpit a buli ti cal. 45 ken 2 a kapsula ti .9mm.

Kitkitaen dagiti autoridad no adda pakainaigan ti pammapatay iti trabaho ti PDEA agent.

Segun ken ni Senior Supt. Virgilio Fabros, Ilocos Sur provincial director, aktibo ni Gautani iti anti-drug ope-rations iti Candon City ken saksi iti nadumaduma a kaso ti droga.#