STA. CRUZ, Ilocos Sur – Dua ti natay iti nagsina nga aksidente a napasamak ditoy nga ili ken iti Narvacan idi Domingo Paskua ken Lunes Santo.
Agpada a naideklara a dead on arrival iti ospsital a nakaitarayanda kalpasan ti pannakaaksidenteda da Aaron Bona y Bundad, 18, estudiante ken residente iti Barangay Sevilla ditoy nga ili ken ni Moreno Pascual y Gaspar, 53, naasawaan, ken residente iti 12 Matipid Street, Sikatuna Village, Quezon City.
Kas maibatay iti police blotter ditoy, agdaldaliasat ti Chevrolet Trailblazer a minaneho ni Jeffrey Abejar y Opleda, 45, naasawaan, mekaniko, ken residente iti L10B4 Golden Acres, Talon V, City of Las PiƱas idi agarup 11:10 ti rabii ti Abril 9 idi mapasamak ti aksidente.
Segun iti report, obertekan koma ni Abejar ti sarsarunuenna a truck ngem dina nakita ti sumungad a Honda XRM a minaneho ni Bona nga awanan iti headlight a puon ti nagdinnungparanda.
Naitaray dagiti drayber iti Sta. Lucia District Hospital ngem saanen a naiyabut pay ti biag ni Bona.
Naikustodia ni Abejar iti police station ditoy para iti umisu a disposision.
Napasamak ti maikadua nga aksidente idi agarup 12:20 ti bigat ti Abril 10, Lunes Santo, no sadino a nainbolbar ti maysa a Hyundai Tucson a minaneho ni Bernie Ancheta y Baniaga, 36, naasawaan, ken residente iti Barangay Sapatan, Dingras, Ilocos Norte; maysa a Honda tricycle a minaneho ni Moreno Pascual y Gaspar, 53, naasawaan, ken residente iti Centro Villa Mercedez, San Quintin, Abra; ken maysa nga Isuzu D-Max a minaneho ni Marco Antonio Dumlao y Gaerlan, 48, naasawaan, ken residente iti 12 Matipid Street, Sikatuna Village, Quezon City.
Iti inisial a panagimbestiga dagiti polis, agpaabagatan a direksion ti Isusu D-Max idi mapapati a kimmaut iti liniana ti kasabatna a traysikel a puon ti nakasapgidan ti sikigan ti traysikel.
Gapu iti daytoy, napukaw ni Pascual ti kontrolna iti manibela ket dinungparna ti sungo ti Hyundai a sumarsaruno iti Isuzu a nakadunoran da Pascual ken ti pasaherona a nabigbig a ni Charito Salvador y Marzan, 31, awanan asawa, ken residente iti Poblacion, San Quintin, Abra. Awan ti naireport a nadunor kadagiti naglugan iti Isuzu ken Hyundai.
Naitaray da Pascual ken Salvador iti Ilocos Sur Central District Hospital, Narvacan ngem naideklara nga awanen ti biag ti drayber.
Mapapati a nakainum da Pascual ken Salvador idi mapasamak ti aksidente.#