Drug surrenderer, naapput nga agipuslit iti maiparparit a droga

ALILEM, Ilocos Sur -Nakipaskua daytoy a drug surrenderer iti pagbaludan ditoy nga ili kalpasan a naaresto nga agipuslit iti maiparparit a droga idi malem ti Disiembre 24.

Sakbayna, idi agarup 3:00 ti malem ti Disiembre 24, maysa nga impormante ti nangitimbre iti kapolisan nga adda maipuslit a maiparparit a droga a naikarga iti Tamaraw FX ket lumasat ti nasao a lugan ditoy nga ili.

Segun iti impormante, naggapu iti Kayapa, Bakun, Benguet, ken nagkarga iti marijuana fruiting tops ti Tamaraw FX a minaneho ti maysa a Marton Comot y Pakpakan, 35, naasawaan, natibo iti Kayapa, Bakun ngem residente iti Marcos Highway, Baguio City.

Apaman a naawatda ti mensahe, nangipasdek ti nagtitipon nga elemento ti kapolisan a pakaibilangan ti Alilem police station, Bakun police station, PIB ISUR, PAIDG ISUR ken PDEA ISSET iti babaen ti superbision ni Police Senior Inspector Jade DC Macaraeg, OIC, iti checkpoint iti Brown Street, Barangay Alilem Daya tapno satdaanda ti naitimbre a lugan.

Idi napasungadan dagiti polis ti lugan iti agarup 4:00 ti malem, sineniasanda ti drayber nga ipaigidna sada kiniddaw nga iparang ti lisensiana.

Idi mapatalgedan nga isu ni Marton Comot, kiniddaw dagiti polis a luktanna ti likud a ridaw ken makannigid a backside cover ti lugan a nagresulta iti pannakaduktalda iti 34 a narolio a marijuana fruiting tops a mapattapatta nga agbalor iti P1.7 million.

Dagus nga inaresto dagiti polis ti drayber ni Comot a naammuan idi agangay a maysa drug surrenderer iti Bakun police station.

Iti kaudian a report, naipaiman iti opisina ti provincial prosecutor, Ilocos Sur babaen ken ni Associate Provincial Prosecutor Hon. David A. Mapala of RTC, First Judicial Region, Branch 25, Tagudin, Ilocos Sur ti kaso a panaglabsing iti RA 9165 maikontra ken ni Comot. (Tawid News Team)