E-governance, maipakat iti Cabugao

CABUGAO, Ilocos Sur – Maipakaten ti e-governance para iti nasaysayaat a serbisio ti gobierno munisipal ditoy nga ili.

Kanaig daytoy, nangaramid ti sangguniang bayan ditoy iti resolusion para iti pannakaipakat ti e-governance ken iti pannakailatang iti pondo para itoy.

Karaman dagiti natratar iti naisayangkat itay nabiit nga Executive-Legislative Agenda meeting ti pannakaipakat ti e-governance ken iti competency assessment ti local government unit.

Maysa a computerization program ti e-governance no sadino a mapadaras ti panagsingir iti buis ken pannakaproseso ti mayor’s permit para kadagiti negosiante ditoy nga ili.

Segun ken ni Mayor Diocaesar Suero, ti Canadian Executive Services Organization (CESO), maysa a Canadian organization ti nangipaay iti training iti computer program idinto a ti gobierno munisipal ditoy ti nangipaay kadagiti maaramat a computer units.

Segun iti maysa nga opisial, babaen ti e-governance, malapdan ti panagkusit iti panagbayadan iti buis ken dadduma pay a taxes.

Ti nasao met laeng a Canadian organization ti nangipaay iti training iti gobierno munisipal ti Tagudin mainaig iti e-governance.#