Gobierno probinsial, nagiwaras iti ramit pagkalap

VIGAN CITY – Agdagup iti P500,000 ti pategna a fishnets, fish cages para maritangtang, tali a mausar iti payaw ket dadduma pay a ramit pagkalap ti inwaras da Gov. Deogracias Victor “DV” Savellano ken Provincial Agriculturist Teofilo Quintal kadagiti innem nga ili ditoy probinsia iti simple a seremonia a naangay iti sango ti kapitolio ditoy idi Nobiembre 9.

Karaman kadagiti nawarasan dagiti organisasion dagiti mangngalap iti ili ti Sinait, Cabugao, Magsingal, Narvacan, San Esteban ken Sta. Cruz.

Kinuna ti gobernador a paset daytoy ti agtultuloy a suportana kadagiti mangngalap ken agbalin metten daytoy a pangallukoyna kadakuada nga idiandan ti maikaniwas a wagas ti panagkalap.

Impakaammo metten ni Savellano nga ituloydan ti naitantan a panagibulos kadagiti fingerlings kadagiti amin a bagi ti danum a masarakan iti probinsia. Indagadag ti gobernador ti panangipasa dagiti barangay council dagiti maseknan a barangay iti resolusion a mangipanamnama iti pannakaprotehir dagiti maibulos a lames tapno saan a matakaw wenno makalap dagitoy a dina pay oras.

Pinagyamanan met dagiti immawat ti di agsarday a suporta kadakuada ti gobierno probinsial babaen ti panangipaayna kadagiti kasapulan iti irarang-ay ti pagsapulanda. Inkari dagitoy a tagipatgenda dagiti naawatda tapno agpaut ken adu ti mabenepisiaranna.#