Footer

High value nga ikan, naidagadag a mataraken

Narvacan, Ilocos Sur – Kinuna ti regional director ti Bureau of Fisheries and Aquatic Resources a saan laeng a bangus ti mailako iti merkado isu a rumbeng nga agtaraken dagiti umili kadagiti dadduma pay a high-value nga ikan kas iti lapu-lapu.

Daytoy ti indagadag ni BFAR Regional Director Nestor Domenden iti laksid a 137% sufficient ti Rehion Uno iti suplay ti bangus ken umabot iti 50%-60% iti pakabuklan ti bangus wenno 110-150 metriko tonelada ti bangus ti aggapu ditoy rehion ti maibumbuntog iti tunggal aldaw iti Navotas.

Inyunay-unay ni Domenden a kasapulan nga ilukat  tumunggal maysa ti panunotda kadagiti baro a kapanunotan nga iyam-ammo dagiti eksperto ti BFAR tapno maaddaan iti pagpilian a gatangen dagiti consumers a high-value a lames malaksid laeng iti bangus.

Ni Domenden ti naisangayan a sangaili iti pannakaipasdek itay Abril 3 ti 10-ektaria a mariculture farm iti Ilocos Sur Polytechnic State College itoy nga ili. Naipasdek  daytoy a proyekto babaen ti panagtitinnulong ti BFAR, gobierno probinsial, LGU ti Narvacan ken Barangay Sulvec babaen ti counterparting scheme.

Kinuna met ni Gov. Deogracias Victor “DV” Savellano a ti panagkalap ti maysa kadagiti kinabaknang ti probinsia gapu iti kaatiddog ti shorelinena nga umabot iti 180 kilometro.

Indawatna nga ibaut dagiti umili ti puonanda iti fishery tapno makipag-compete iti sabali a probinsia tapno dagiti umili ditoy ti agsagrap iti nasao a resources ti Ilocos Sur.

Kabayatanna, impatalged ni Mayor Edgardo Zaragoza a sidadaan ti LGU ti Narvacan nga agipuonan kas pangtulong kadagiti agkalkalap ken ISPSC.

Kinuna ni Mayor Edgardo Zaragoza a mangnamnama nga agbalin a fish capital ti probinsia ti ilina a Narvacan no agballigi ti naipasdek a mariculture park.

Ginuyugoy met ni ISPSC President Rafael Querubin dagiti estudiante nga agadalda iti kurso iti fisheries.

Kinunana a bassiten dagiti mayat nga agadal iti kastoy a kurso ken bumasbassit metten dagiti technicians ken sientipiko a mangadal iti marine resources.

Aganay P200,000 ti pategna a lapu-lapu ti naibulos ditoy iti dayta met laeng nga aldaw kas pangrugian a mataraken. Malaksid itoy,  mataraken ditoy ti agduduma a seaweeds ken shells.#