Ilocandia Singing Idol 3 agtuloy, impatalged ni Bokal Zaragoza

NARVACAN, Ilocos Sur – Impatalged ni Bokal Zuriel Zaragoza nga addanto manen maisayangkat a pasalip iti panagkanta kalpasan panagballigi ti Ilocandia Singing Idol, Season II.

Naggibus ti Season II ti Ilocandia Singing Idol, brainchild ni Zaragoza, idi Mayo 6, tartaraudi nga aldaw ti panangselebrar ti Vigan City iti Viva Vigan Festival of the Arts.

Inyalat ni Jenny Jane Aguiner, taga-Caoayan, Ilocos Sur ti P100,000 a premio idinto a maikadua ni Vanessa Absing iti Santo Domingo, Ilocos Sur, (P60,000); maikatlo ni Jolethe Bueno, (P40,000); ni maikapat ni Kenley Filarca iti Magsingal,; ken maikalima ni Frances Gia Gazmen iti Narvacan, maikalima.

“Nagpatpatangkami kenni Maestro Ryan Cayabyab mainaig iti pannakaisayangkat ti Season 3 ti Ilocandia Singing Idol ket masapul a napimpintas ti pasalip magun-od ti gagem a panangtakuat kadagiti talentado nga Ilokano iti lubong ti musika,” kinuna ni Zaragoza.

Kinuna ti bokal a dina ekspektaren a kastoy ti kadakkel ti pasalip a mismo a ti pay mabigbigbig a kompositor ken kumakanta a ni Ryan Cayabyab ti kangrunaan a hues iti finals ti pasalip.

Dimmakkel ti premio dagiti nangabak gapu iti panangdoble ni Sen. Bong Revilla iti premio.

Malaksid iti P100,000 a premiona, naikkan pay ni Aguiner iti scholarship grant ti Ryan Cayabyab School of Music.

Naangay ti Ilocandia Singing Idol Season II iti las-ud ti dua a bulan kadagiti nadumaduma nga ili ket nagpinal iti Vigan City idi Mayo 6.#