Footer

Ilocos Norte nakitulag iti Japan para iti pagtrabahuan ti nars, caregivers

By Freddie G. Lazaro, PIA 1

LAOAG CITY – Nakitulag ti gobierno ti Ilocos Norte iti gobierno ti pagilian a Japan para iti pannakaipaay ti pagtrabahuan dagiti rehistrado a nars ken caregivers manipud iti probinsia.Kinuna ni Ann Marie Lizette Bitancor, mangidadaulo iti Public Employment and Service Office (PESO) iti Ilocos Norte, a ti nasao nga addang ket “government to government” a nangkiddawan ti probinsia iti tulong manipud iti Philippine Overseas Employment Administration (POEA).

Iti agdama, imbatad ni Bitancor nga agkasapulan ti pagilian a Japan ti 600 caregivers ken 150 a rehistrado a nars.

Imbalakadna kadagiti inte-resado a mapan agtrabaho idiay Japan a birokenda ti website ti POEA sakbay nga agturongda iti opisina ti PESO tapno kitaenda dagiti masapul a dokumento.

Inlawlawagna a kasapulan dagiti aplikante ti sumaganad a dokumento: detaliado a resume ken dua a 2×2 a ladawan, authenticated College Diploma para kadagiti aplikante a caregiver; Transcript of Records ken valid PRC ID para kadagiti aplikante a nars, sertipikasion ti nagtrabahuan para kadagiti aplikante a nars; ken valid a sertipiko manipud TESDA para kadagiti aplikante a caregiver.

Gapu ta kasapulan dagiti aplikante ti “certificate for Japanese language,” impal-gakna a mangiwayat ti gobierno ti Ilocos Norte babaen iti liderato ni Gobernador Imee Marcos ti maysa a panagsanay no kasano ti agsarita, agsurat ken agbasa ti lengguahe a Niponggo iti Japan.#