Ilocos Sur, 100% energized: ISECO general manager

SANTIAGO, Ilocos Sur – Naidanonen ti elektrisidad kadagiti amin a barangay ditoy probinsia, daytoy ti impakaammo ni Ilocos Sur Electric Cooperative General Manager Cesar Gironella.

“100 per cent nga energized ti Ilocos Sur ket maipagpannakkelmi dayta,” kinuna ni Gironella iti interbio kenkuana ti media bayat ti 31st Annual General Membership Assembly a naangay iti main officeda ditoy nga ili idi Nobiembre 21.

Karaman kadagiti sangaili ti ISECO iti daytoy nga aldaw da Gov. Deogracias Victor Savellano, Cong. Jose Ping-ay ti COOP-NATCO ken dadduma pay nga opisial ti probinsia ken il-ili.

Naidatag bayat ti asemblea ti nagapuanan ti kooperatiba mainaig iti pannakaidanon iti koriente kadagiti nadumaduma nga ili.

Inlawlawag ni Gironella a malaksid ti sumagmamano laengen a sitio a di pay napasilawan, puntiriada a maipatungpal daytoy a programada kadagiti aminen a lugar ditoy probinsia iti 2010.

Kinuna ni Gironella nga adda pammilin ti National Electrification Administration iti kooperatiba a mangilatang iti pondo para iti enerhisasion amin a lugar iti probinsia.

Bayat ti asemblea, lima a lugar ti naisayangkatan iti symbolic energization a pakairamanan ti sitio Liqueo ken sitio Namecbecan iti Barangay San Luis, Cervantes, Ilocos Sur, sitio Burayok ken sitio Tagpew iti Dinwende West, Cervantes met laeng ken iti Barangay Lamag iti Quirino, Ilocos Sur.

Ti tema ita a tawen: “Serbisio a Naimpusuan, Mangsaranget Pannubok Natalged a Masakbayan”.#