Ilocos Sur delegation, stranded iti Sorsogon

SORSOGON – Nataktak ti panaggawid dagiti opisial ken atleta ti Ilocos Sur gapu ta saan a makalasat ti luganda ditoy a probinsia gapu iti pannakaputed ti kalsada a pagdalanan ti luganda a ginubuay ti idadalapus ni Bagyo Dante.

Iti text message nga impatulod ti maysa nga opisial ti nasao a delegasion iti DWRS, kinunana a saan a makalasat ti luganda iti naiyanud nga imbornal gapuna a kapilitan a kimmamangda iti city hall ditoy.

Nupay kasta, iti interbio ni Jun Ramos ken ni DepEd Ilocos Sur Physical Education Supervisor Meneleo Palma a naipatangatang iti DWRS, impakaammo ti opisialĀ  a nasayaat met ti kasasaad dagiti atleta nupay nakisangen ti pondoda para iti ipaunegda a taraon.

Kagapgapu ti delegasion iti Palarong Pambansa a naangay iti Tacloban ket aggawiddan iti Ilocos Sur idi saanda a makalasat iti dalan a puon ti nakataktakan ti biaheda.

Agdagup iti nasurok a 50 nga atleta ken opisial manipud iti Ilocos Sur, Vigan City ken Candon City ti nairaman iti delegasion ti Ilocos Region Athletic AssociationĀ  a napan nakisalip iti Palarong Pambansa a naangay iti Tacloban City idi Abril 26-Mayo 2, 2009.

Sangapulo ket dua a lugan ti inarkila ti IRAA delegation ngem naglugan iti maymaysa a bus ti delegasion ti Ilocos Sur a buklen ti 28 nga atleta iti DepEd Ilocos Sur, 22 iti Candon City ken sumagmamano nga atleta ti Vigan City, segun ken ni Palma.

Naammuan ken ni Palma nga iti 15 nga atleta ti DepEd Ilocos Sur, adda maysa a medalia nga inyawidda, ti silver medal ni Jonathan Haban a nangabakĀ  iti 200 meter dash, boys, secondary.#