Footer

Ilocos Sur, naipromot kas pagbakasionan

Cebu City – Naipromot ti probinsia ti Ilocos Sur kas Total Vacation Package iti naangay a Philippine International Trade Fair ‘09 a naangay iti Marco Polo Plaza ditoy siudad idi Hunio 25-27.

Nakipaset ti gobierno probinsial iti nasao a trade fair tapno maitandudo ti turismo ti probinsia.

Maysa a booth ti impatakder ti probinsia bayat ti trade fair a nakaipaketean ti Ilocos Sur a kas total a pagbakasionan. Nairaman ditoy dagiti packages kas iti package adventure tour, business tour, pilgrimage tours, heritage tours, culinary tour ken dadduma pay a mabalin nga ipagpannakkel ti probinsia kadagiti turista.

Kinuna ni Gov. Deogracias Victor Savellano a babaen ti nasao a trade fair, agtultuloy a maam-ammo ti Ilocos Sur iti tay-ak ti turismo.

Kinunana a babaen ti pannakaipakita dagiti ladawan ti probinsia kadagiti turista iti Cebu, maaddaan dagitoy iti idea no kasano ti langa ti Ilocos Sur ket maay-ayoda a pumasiar ditoy.

Saan a mailibak a ti Cebu ti maysa kadagiti kangrunaan a daydaywen dagiti turista iti intero a pagilian iti agdama ket adu la ketdi dagiti makakita kadagiti ladawan. Adda met dagiti flyers ken brochures a libre a maited kadagiti bimmisita iti booth,” kinuna ti gobernador.

Ti tema ti trade fair: “Best Hospitality on Earth… Philippines”.#