Iti maika-10 a Tawenna: Ilocos Sur Hotline, agtultuloy ti panagserbina

STO. DOMINGO, Ilocos Sur – Iti panangselebrar ti gobierno probinsial iti maika-10 a tawen ti programana nga Ilocos Sur Hotline iti DWRS Comando Radyo, agtultuloy met ti panangipaayna iti agduduma a kasapulan dagiti nakurapay a kaprobinsiaan.

Itay Agosto 15, naangay ti special edition ti nadakamat a programa iti Peoples’ Coliseum ditoy nga ili a dinar-ayan ti sumurok kumurang 1,000 nga umili manipud iti agduduma a paset ti Ilocos Sur.

Indauluan ni Gov. Deogracias Victor “DV” Savellano ti nasao a selebrasion babaen ti pannakikammayyet ni Mayor Floro Tadena, Vice Mayor Tony Boy Que, dagiti bokal, kokonsehal kasta metten ti sibubukel a puersa ti DWRS ken ti opisina ti gobernador.

Iti panagsarita ti gobernador, pinagyamananna ti agtultuloy a panangsappuyot dagiti umili iti programa kagiddan ti panangikarina a saanto a mapugsat daytoy a linia a tumultulong kadagiti amin nga agkasapulan.

Kasla kaano la daydi panangirugitayo itoy a programa. Ita, agsangapulon a tawenna iti ere. Agyamankami kadagiti suhestionyo babaen ti text ta tunggal mensaheyo ket agbalin a pagsarminganmi tapno maited dagiti kasapulan dagiti kaprobinsiaan,” kinuna ni Savellano.

Bayat ti programa, nagtudo dagiti agduduma a papremio para kadagiti dumdumngeg iti radio ken dagiti nagbuya. Karaman ditoy ti 2 a washing machine, 2 a TV, 2 a repriheratura, 20 nga electric fan, 20 a radio cassette, 8 a cellphones, 6 a kaban a bagas, 50 a glasswares ken T-shirts.

Iti benneg dagiti nataengan a “Sagutanka, Lolo ken Lola”, naipaayan dagiti nagsurat iti grocery items, medical assistance, kitchen utensils, galba, wheelchairs, sarukod ken nebulizers idinto nga school supplies met ti naipaay kadagiti ubbing a nagsurat iti benneg a “Wishko sa Hotline”.

Inwaragawag pay ni Savellano a “Balay Taripato” ti nagbalin nga opisial a nagan ti Home for the Aged iti Magsingal.#