Kolumnista ti Tawid News, umuna a premio iti Palanca Awards 2009

VIGAN CITY – Maysa a reporter iti radio ken kolumnista iti aglinawas a pagiwarnak ditoy probinsia ti mangidaulo kadagiti mapadayawan nga Ilokano a mannurat iti Palanca Awards ita a tawen .

Inyalat ni Danny Antalan, reporter ti DZTP ken kolumnista ti Tawid News Magasin ti umuna a gunggona iti salip iti sarita (Ilocano Category) ti Palanca Awards 2009 babaen ti saritana a “Vigan”.

Awaten ni Antalan ti cash prize a P12,000, medalia ken certificate iti seremonia a maangay iti Peninsula Manila, Makati City inton Septiembre 1, 2009.

Kadua ni Antalan a mapadayawan da Ariel Tabag, entertainment editor ti Bannawag, a nangabak iti maikadua a gunggona ken ni Reynaldo A. Duque, retirado nga editor ti Liwayway, a nakagun-od iti maikatlo a gunggona.

Daytoy ti maikatlo a daras nga inyalat ni Antalan ti umuna a gunggona iti Palanca Awards, umuna idi 2005 babaen ti saritana a “Goyo” ken ti “Dangilen” a nangabak idi 2008.

Nangabak pay ni Antalan iti maikadua a gunggona idi 2006 babaen ti saritana a “Tugot”.#