Kontaminado nga inumen nakagapu panagibleng dagiti aganay 400 lumugar iti 5 a barangay

BAGUIO CITY – Kontaminado ti danum nga ininom dagiti agnaed iti lima a barangay ditoy siudad, segun iti departamento ti salun-at.

Kanaig daytoy, naglak-am ti city government ditoy iti pammabalaw manipud kadagitiĀ  pamilia dagiti nayospital gapu iti mapapati a dina panangitaltalek iti pannakatarimaan iti nabtak a linia ti sewer ti siudad a nangkontaminar iti danum nga inumen dagiti residente iti lima a barangay a nakaigapuan iti panagtakki ken panagsakit ti tianda.

Aganay 400 a residente iti Barangay Imelda Village, M. Roxas, St. Joseph, Purok 4 iti Brookside ken East Modern Site iti Aurora Hill ti nayospital gapu iti panagsakit ti tian ken panagtakkida.

Naammuan iti rekord ti city health office a 145 dagiti nayospital manipud iti Manuel Roxas-Teachers Camp ; 112 iti St. Joseph; 64 iti Imelda Village, 34 iti Brookside ken East Modernsite.

Nupay kasta, kaadduanna kadagiti pasiente ti napagawid met laeng malaksid ti 14 a kasapulan pay a maobserba.

Pinarikpanen ti Baguio Water District ti linia ti danum nga agturong kadagiti apektado a barangay agingga iti saan a matarimaan ti nabtak a linia ti sewer.

Kinuna pay ti BWD a saanda a pagbayaden dagiti residente manipud idi nakontaminar ti danum nga inumenda agingga iti saan nga agbalin a normal ti operasion kadagitoy apektado a barangay.

Ngem kinuna dagiti naapektaran a pamilia a rumbeng a bayadan ti BWD ti nagastoda iti pannakayospitalda, saan ketdi a dida bayadan ti billda iti tiempo a nakontaminar ti inumenda.

Binabalaw pay dagiti agnaed dagiti agtuturay ti gobierno ti siudad gapu iti panangipamaysada ti imatangda iti problema ti basura ket dida intaltalek ti problema ti sewer ti siudad a nangkontaminar iti danum nga inumenda.#