Kontraktor ti Vigan airport, impasingkedna solbaren malayus a taltalon

VIGAN CITY – Saanen nga ituloy ti sangguniang panlungsod nga ited iti Department of Transportation and Communication ti maysa a resolusion mainaig iti problema dagiti naapektaran nga agtagikua iti daga maigapu iti konstruktion iti Vigan Airport.

“Nagbalinen a moot and academic ti pending a resolusion gapu ta addan pammatalged ti kontraktor iti proyekto, ti Air Transportation Office a solbarenda ti problema dagiti agtagikua dagiti daga a naapektaran iti kontruksion iti Vigan Airport,” kinuna ni Vice Mayor Franz Ranches bayat ti programana a “Ti Konseho ti Vigan” a naipatangatang iti DWRS itay nabiit.

Kinuna ti bise mayor nga impatalged ti kontraktor nga ikkanna iti solusion iti problema dagiti malaylayus a taltalon iti asideg ti maar-aramid nga airport kas iti panangikabilna kadagiti imbornal ken drainage system tapno adda pagayusan ti danum.

Nagreklamo dagiti addaan talon iti asideg ti airport gapu iti pannakalayus ti talonda maigapu iti maar-aramid nga eropuerto.

Kangrunaan a naapektaran dagiti talon iti paset ti Barangay Bulala.

Kinuna ni Ranches nga impatalged met ti ATO ti pannakaited iti atension iti problema dagiti malayus a taltalon iti asideg ti airport ken ti panangikari dagiti lumugar ken maseknan a mannalon iti kooperasionda iti pannakasolbar iti problema.

Naammuan iti bise mayor a naipaiman iti city government ti funding ken naurnos metten dagiti pappapeles para iti just compensation dagiti naapektaran nga agtagikua iti daga iti aglawlaw iti maar-aramid nga airport.

Kinunana a saanton a maipalubos ti panagballasiw dagiti lugan iti runway ti airport no di ket addanton dalan a paglikosanda.

“Mairuamda koman a saan agballasiw iti runway ti airport tapno saanen a mais-isturbo ti runway ken para iti public safety,” kinuna ti bise mayor.

Innayon ni Ranches a gapu ta addan voluntary a commitment amin dagiti maseknan, saandan nga ited ti inaramidda a resolusion iti DOTC ta nagbalinen a moot and academic.#