Kultura, napintas a lugar iti I. Sur, dinayaw ganggannaet a tourism stakeholders

VIGAN CITY – Saan laeng a napnek dagiti sangaili manipud iti ganggannaet a pagilian kadagiti maipagpannakkel a merienda ti Ilocos Sur, nagbussog pay ti matada kadagiti napintas a buya ken kultura ditoy probinsia.

Dinayaw ti duapulo a delegasion manipud iti China, Korea, Switzerland, France, U.S.A, ken New Zealand ti kinamanagsangaili dagiti Ilokano kasta met dagiti napipintas a lugar ditoy probinsia bayat ti panagbisitada idi Hulio 7 kas paset ti travel mart nga inrusat ti Department of Tourism (DOT).

Buklen ti delegasion dagiti eksperto iti agduduma a negosio ken serbisio nga adda pakainaiganna iti tourism industry manipud kadagiti nadakamat a pagilian.

Inrusat ti Department of Tourism ti nasao a travel mart a napanaganan iti I Travel, I Explore Philippines Meetings, Incentives, Conventions and Exhibitions (M.I.C.E.) Buyers ket maysa ti probinsia ti Ilocos Sur a pinilina a bisitaen ti delegasion..

Nupay apagbiitda iti probinsia, naipasiar ti delegasion ken naipakita kadakuada dagiti kultura ken rinamananda dagiti agduduma a potahe Ilokano.

Dinayaw dagiti sangaili ti nabara a panangsangaili kadakuada ti gobierno probinsial kadakuada ket inkarida ti panagsublida.

Karaman kadagiti pinasiar ti delegasion ti Syquia Mansion a pagtaengan daydi Pres. Elpidio Quirino. Ditoy a naangay ti maysa a programa a nakaipangngegan kadagiti sangaili dagiti samiweng-Iloko ken nakaiparamanan iti merienda kas iti empanada, tinubong, bibingka, binagkal, chichacorn ken agduduma a prutas.

Nagbuya pay dagiti sangaili iti craft demo ken santacruzan iti heritage villege sakbay ti ipapanda iti igid ti baybay Cabugao.#