Kurso nga agkasapulan iti trabahador, maikampania

VIGAN CITY – Napirmaan iti nagbabaetan ti Regional Development Council (RDC), Department of Education (DepEd), Association of Private Schools College and Universities (APSCU), Philippine Association of State Universities and Colleges (PASUC) ken dadduma pay a maseknan nga ahensia ti Memorandum of Agreement on Job Mismatch bayat ti naangay a Regional Development Council  ExCom Meeting a naangay itoy a siudad idi Abril 29.

Sagudayen ti nasao a MOA ti panagtitinnulong dagiti maseknan tapno maikampania dagiti kurso nga agkasapulan kadagiti trabaho tapno maksayan dagiti agraduar iti saan unay a kasapulan a kurso.

Imonitor pay dagiti nagpirma iti MOA ti national aptitude test dagiti agad-adal iti sekundaria tapno maammuan no ania a field ti paglaingan dagiti estudiante tapno daytoy ti mairekomenda a sumrekanna a pagadalan.

Segun kadagiti nagpirma, babaen itoy  nga addang, maikabassit ti unemployment ken underemployment rate iti pagilian ta ad-adu dagiti estudiante a maaddaan iti trabaho.

Nakuna ti maysa nga opisial nga adu dagiti trabaho ngem kaaduan met a kurso dagiti agraduar ket saan a mayataday iti kasapulan nga empleado dagiti kompania ken ahensia.#