Landfill ti Candon City, malpasen: CENRO officer

CANDON CITY – Malpasen ti landfill area wenno pagibellengan, pagresiklan ken pakailasinan kadagiti basura itoy a siudad sakbay a malpas daytoy a tawen, segun iti City Environment and Natural Resources officer ditoy.

Kinuna ni Engr. Ismael Ganaban, CENRO officer, daytoy bulan koma ti Agosto a malpas ti nasao a landfill no di gapu iti panagtudotudo ken panagbagyona.

Bareng malpasmi iti daytoy a tawen ta kompleto metten dagiti material, ket ti laengen mangilay-out iti liner ken PVC pipe ti aramidenmi,” kinuna ti inhiniero.

Kinuna ni Ganaban a ti laengen maipatakder a warehouse ti kayatda a maikkan iti pondo ta ditoyto ti pakailasinan kadagiti basura ken pakaurnonganda payen.

Naammuan ken ni Ganaban a 35 meters by 40 a naaramid iti fiber plastic ti maikabil a liner idinto a ti PVC pipe ti agbalin a collection pipe wenno pagayusan ti tubbog ti basura tapno saan a mapan iti uneg iti daga, kaykayo ken kabalbalayan.

Nangisayangkat ti opisina ni Ganaban iti tree planting iti asideg ti landfill area kadagiti napalabas a tawen tapno maaywanan ken maprotektaran ti kabanbantayan nga ayan daytoy.

Iti agdama, iti barangay Darapidap nga adda iti igid ti baybay ti pagibellengan iti basura. Iti sabali a bangir, masarakan ti landfill area iti kabambantayan a sakup ti barangay Balingaoan.

Kinuna ni Engr. Ganaban a nupay bassit pay laeng ti landfill, namnamaenna nga addanto manen cell a maipasdek iti panaglabas ti tawen.

Kabaelan ti nasao a landfill a laonen ti makatawen a basura no awan ti segregation ngem no nainget a maipakat ti pannakalasin dagiti nabubulok ken dagiti di nabubulok, kabaelanna a laonen ti basura iti tallo a tawen, kinuna ni Ganaban.#