Lider ti grupo a gun-for-hire, 2 kaduana, nakemmeg

UMINGAN, Pangasinan – Tallo a kameng agraman ti mapapati a pangulo ti maysa a patangtangdanan a pumatay a grupo ti inaresto dagiti nagtitipon a bunggoy dagiti polis iti paglemlemmenganda iti Barangay San Leon, ditoy nga ili iti agarup ala una ti malem itay Hulio 20.

Kinemmeg ti nagtitipon a bunggoy dagiti polis nga indauluan ti Intelligence Branch ti Pangasinan Police Provincial Office da Manny Colisao, 31, pangulo ti Colisao Gang, mapapati a gun-for-hire a grupo; ti kabsatna a ni Modesto Colisao, 25; Alver Mendoza, agpapada nga agnaed iti Barangay Banaoang, Malasiqui; ken ni Jojo Torio, 21, residente iti Barangay Labit, Villasis, Pangasinan.

Nakumpiska dagiti polis iti ikut ti grupo ti .45-caliber pistol, .38-caliber revolver, dua a granada, dua a magasin para .45-caliber a paltog, ken 28 a bala.

Kanaig daytoy, pinadayawan ni Police Chief Superintendent Ramon V. Gatan, PRO1 Regional Director, dagiti polis a nakakemmeg ken ni Colisao ken ti grupona idinto nga innayonna a “resulta daytoy iti naipangruna a kampaniada a mangparmek kadagiti organisado a grupo ken panangpugipog iti panagraira dagiti armas.”

Kuna ti polis a nainbolbar ti Colisao Gang kadagiti panagpapatay ken panagtakaw ken panaghold-ap iti Pangasinan, Tarlac ken kabangibangda a probinsia ket kaadduanna a biniktimada dagiti Indian national ken dagiti mensahero dagiti door-to-door delivery companies ken nairamanda iti listaan ti PNP kadagiti grupo a kriminal iti babaen ti Category 1 ti Partisan Armed Groups (PAGs).

Segun pay iti polis, adda impaulog ni Judge Emma Bauzon ti RTC Branch 57, San Carlos City (Pangasinan) a warrant of arrest maikontra kadagiti agkabsat a Manny ken Modesto Colisao.

Ti pay nasao a grupo ti masuspetsa a nangpatay ken ni Luisito Gabat, Sr. , prinsipal, idi Marso 2, 2009 ken ni Flor Benitez, dati a barangay a kapitan, idi Marso 31, 2009, nga agpada a naisayangkat iti Barangay Gomez, Malasiqui.#