Lions Club-Candon, LGU ti San Vicente, nangisayangkat iti medical mission

CANDON CITY – Nangisayangkat ti Lions Club-Candon City iti medical mission ken relief operation idiay Tuguegarao, Cagayan itay laeng Oktubre 30, segun ken ni Jane Fontanilla.

Mismo nga indauluan ni Lions Governor Modesto Pacquing ti nasao a medical mission ken relief operation kas tulong ti nasao a gunglo kadagiti umili a nadidigra iti Bagyo Pepeng ken Ramil itay nabiit.

Kinuna ni Fontanilla a 300 a pamilia ti nawarasan iti relief goods ken naipaayan iti medical check-up ken agas.

Sakbayna, nangisayangkat ti gunglo iti First Sight Mission ditoy siudad, konsultasion iti mata ken panangited iti libre a reading eyeglasses.

Sabali pay a medical ken dental mission ti naisayangkat itay Oktubre 29 kas paset ti programa ti lokal a gobierno ti San Vicente, Ilocos Sur nga idadauluan da Mayor Jose Tabanda III ken ti asawana a ni Vice Mayor Nancy Tabanda a pannakaipaay ti umno a salun-at dagiti kailianda.

Iti mismo a Rural Health Unit ti munisipio ti nakaisayangkatan ti nasao a medical ken dental mission.#