Footer

Lokal a kalsada mapagbalin a kalsada nasional

VIGAN CITYMaysa a resolusion a mangyendorso kadagiti sumagmamano a lokal a kalsada a national road ti inaprobaran dagiti kameng ti konseho iti baet a dumalan pay iti ad-adu a konsultasion ditoy.

Paset ti napagpapatangan iti committee meeting ti benneg ti inprastruktura nga idauluan ni Konsehal Hermenigildo Apelin ken dadduma pay a maseknan maipanggep ti naipalaon iti House Bill 4518 wenno Conversion of Local Roads to National Roads no sadino a sumagmamano a barangay roads ti maapektaran.

Karaman a maapektaran ti Bulag-Raois-Rugsuanan-Junction, Nagsangalan, Cabaroan Daya, Bantay babaen ti Bongtolan, Vigan City babaen ti Naguilian, Caoayan, Ilocos Sur babaen ti Junction Vigan-Caoayan Junction, Quirino-Pandan Junction, Salindeg-Salindeg Pong-ol Junction, Mindoro Road – Baracca-Paratong-Bulala-Vigan Airport, Ilocos Sur.

Inlungalong ni Congressman ti First District Ronald Singson ti nasao a gakat a naiturong iti opisina ni Sen. Ramon Revilla, chairman ti committee on infrastructure sadiay Senado.

Kabayatanna, inrekomenda ni Atty. Melygene Tesoro, legal consultant ti siudad, a bayadan ti gobierno dagiti maapektaran a pasdek iti nasao a gakat a pakairamanan dagiti Day Care centers, kapilia ken sumagmamano a pagtaengan no legal la ketdi ti pannakatagikua dagitoy.

Kinuna ni Tesoro nga awan ti obligasion ti gobierno no illegal ti pannakatagikua dagiti maapektaran iti pannakapalawa dagiti kalsada.

Paset ti pannakapalawa dagiti agdama a lokal a kalsada iti plano iti city government a panagbalinna a globally competitive.

Maysa kadagiti mabenepisiaran a barangay ti Baracca gapu iti mapaspasungadan a pannakalukat ti Mindoro airport.

Impakaammo ni Gov. Deogracias Victor Savellano bayat ti tourism summit a mangrugi ti panagbiahe ti eroplano babaen ti Inter-Island Airlines inton Marso 19.

Agbiahe ti Inter-Island Airlines manipud Manila iti alas kuatro ti malem ti Domingo ket agsubli iti 7:30 ti bigat ti Lunes. Tumayab met ti maikadua a biahe iti 4pm ti Huebes ket agsubli iti Manila iti 7:30 iti bigat ti Biernes.

Segun ken ni Luc Helgen, chairman ti nasao nga airline a P3,450 ti plete ti one-way a biahe ken P6,900 ti round trip. (Nemia Icari )