Maestro, pinapatay armado a tattao a nakasakay iti motorsiklo

MAGSINGAL, Ilocos Sur – Maysa a maestro ti nainayon iti umat-atiddog a listaan dagiti biktima ti pammaltog ditoy probinsia, partikular ditoy nga ili.

Nabigbig daytoy kaudian a biktima ti pammaltog a maysa a Mario Contaoi y Rivera, 52, naasawaan, mangisursuro iti University of Northern Philippines, dati nga anaunser iti radio nga imatonan ti Simbaan Katoliko, ken residente iti Barangay San Lucas, ditoy nga ili.

Napaltogan ni Contaoi bayat ti ilalabas ti Honda XRM a motorsiklona iti sango ti dati a Milko Videoke Bar iti igid ti dalan ti national highway a sakup ti Barangay San Ramon, Magsingal idi agarup 10:30 ti rabii ti Enero 6.

Segun iti inisial a report, mapapati a sinurot dagiti armado a suspek a naglugan iti di ammo a motorsiklo ni Contaoi bayat ti panagpaamiananna sada pinaltogan daytoy iti nagsasaganad iti sanguanan ti nadakamat a dati a videoke bar.

Immuna nga intaray dagiti nagresponde a polis ni Contaoi iti Magsingal District Hospital ngem naiyalis daytoy iti Northside Doctors Hospital, Bantay, Ilocos Sur gapu kadagiti grabe a sugatna iti nadumaduma a paset ti bagina.

Nagsatan iti anges ni Contaoi idi agarup 2:20 ti agsapa ti Enero 7 bayat ti pannakatamingna iti nadakamat nga ospital.

Naglibas dagiti di nabigbig a suspek iti agpaamianan a direksion.

Nangiwayat ti polis-Magsingal iti dragnet operation ken nangipatulodda iti flash alarm kadagiti kabangibangna a police stations ngem iti pannakaisurat daytoy, negatibo ti resultana.

Iti panangproseso ti SOCO team manipud iti PCLO, Ilocos Sur PPO iti crime scene, nakarekobreda iti innem a kapsula manipud iti cal. 45.

Nakaduktalda pay kadagiti nadumaduma a bala iti back pack ni Contaoi a pakairamanan ti tallo a naiputok a cartridge cases ti cal. 38; 2 bala para  Cal .38; maysa a bala para cal .380; maysa a bala para cal 5.56mm; 3 bala para cal .45; maysa a  magazine para cal .45 a nagkarga iti 7 a bala; maysa a  Lenovo tab; maysa a hand-held radio (ICOM IC-V8); maysa a Rambo knife; maysa a kitchen knife; maysa a USB; ken maysa a  Led retro lamps night light.

Kinuna ti kapolisan ditoy nga agtultuloy ti panagimbestigada ken sumaruno ti progress report mainaig iti nasao a pammapatay.

Idi napan a tawen, sumagmamano a prominente a tattao ti nagudas babaen ti paltog ngem awan pay ti pakabigbigan dagiti suspek.

Idi Septiembre 15, napaltogan ni Atty. Melver Tolentino y Garace, 42, iti sango ti Shell Gasoline Station a masarakan iti Barangay Sta. Monica, Magsingal.

Idi agsapa ti Nobiembre 13, 2016, napapatay ni Sangguniang Bayan Member Freddy Arquero y Rita-Rita, 55, iti national highway a sakup ti Barangay San Basilio.

Saan pay a nabigbig dagiti suspek.

Nupay kasta, iggemen ti polis-Magsingal ti resulta ti digital forensic examination nga inwayat ti Anti Cyber Crime Group, Camp Crame, Quezon kadagiti napadakkel a video footages a manamnama a makatulong iti pannakatiliw dagiti suspek iti pannakapapatay da Tolentino ken Arquero.(Tawid News Team)