Mailako a karne ti baboy, maitulod iti tiendaan ti Vigan babaen ti delivery van

VIGAN CITY – Kinuna ni Konsehal George Villanueva a maitulodton dagiti naparti a baboy babaen ti delivery van tapno garantisado a dagiti laeng naparti iti slaughterhouse ti maiserek iti tiendaan publiko ditoy.

Inaprobaran ti city council ditoy iti sessionda itay Agosto 17 ti ordinansa a pinutar da Konsehal Loreto Quibilan, George Villanueva ken Henry Formoso a mangituding iti pannakaitulod babaen ti delivery van dagiti karne ti baboy a maparti iti slaughterhouse a mailako iti tiendaan ditoy siudad.

Kinuna ni Villanueva a kangrunaan a panggep ti ordinansa ti pannakaprotektar kadagiti aggatang iti karne ditoy siudad idinto a dinakamatna dagiti mabuybuya iti telebision dagiti tinoleda a “double dead” a karne ti baboy a mailaklako iti tiendaan.

“…Amin a baboy, masapul a maparti iti slaughterhouse tapno masigurado a napintas ti salun-atda ken maideliberto dagitoy babaen ti delivery van tapno garantisado a dagiti naparti ditoy ti maipan iti tiendaan,” kinuna ni Villanueva.

Innayon ni Villanueva a maymaysa laeng ti pakaiserkan dagiti naparti a lako a baboy tapno masigurado nga awan ti maiserrek a karne ti baboy a saan a naparti iti slaughterhouse.

Naammuan nga agbayad ti agpadeliber iti naparti a baboy iti P25 kada maysa nga ulo ken P30 kada ulo dagiti nuang ken baka.

Mainaig iti amak dagiti aggatang a ngumina ti presio ti karnegapu iti kaadda iti bayadan dagiti tindera iti pannakaideliber dagiti naparti a baboy a lakoda iti tiendaan, kinuna ni Villanueva nga uray iti napalabas, mangar-arkilan dagitoy iti traysikel wenno adda luganda a mangitulod iti lakoda iti public market ket isu met la ti magastoda wenno nalaklaka pay.

Kinuna ti konsehal a mapan iti maintenance ti delivery van ken sueldo ti drayber ti makolekta a pagbayad iti pannakaitulod dagiti naparti a baboy a lako iti tiendaan.

“No agballigi daytoy a programa, gumatangtayo iti back-up a delivery van tapno agtuloytuloy ti pannakaideliber dagiti naparti a baboy iti tiendaan,” kinuna ni Villanueva.

Naammuan iti konsehal a mapalpalanasen iti opisina ti mayora ti implementing rules and regulations para iti pannakaipatungpal ti nasao nga ordinansa.#