Footer

Mannipdut, natiliw iti galiera

CAOAYAN, Ilocos Sur – Maysa a lalaki ti kinemmeg dagiti polis kalpasan a dinukotanna ti maysa a mammallot iti galiera ditoy nga ili.

Positibo nga intudo ni Pedro Pilot y Corpuz, residente iti Sagpat, Bantay, Ilocos Sur ni Joselito Migue y Pilar, 53, mapapati a taga-Pug-os, Cabugao nga isu ti nangdukot iti kuartana a P5,200 a naikabil iti pantalonna.

Iti panagimbestiga dagiti polis, inabay ti suspetsa ni Pilot sana dinukot ti kuarta daytoy. Ngem nakadlaw ni Pilot ket nagpaarayat kadagiti padana a mannadi a nangkemmeg iti suspetsa sada impan iti police station.

Bayat ti pannakapalpalutpot ti suspetsa, sumagmamano a mammallot ti nagturong iti police station ket nagreklamoda a nadukotanda met iti kuarta iti galiera.

Iti pulongda iti polis, nadukotan ni Josefino Rapisura y Rapada, residente iti Cabuloan, Sta. Catalina iti P11,000; ni Joseph Rugnao, residente ti San Sebastian, San Vicente iti P1,200; ni Faustino Corpuz y Pilot, Bantay iti P900; Raffy Queddeng iti P1,000 ken maysa nga Eric Cordero a mapapati a nadukotan iti P19,000.

Nasukainan dagiti polis iti ikut ti suspetsa ti kuarta ni Pilot.

Mapapati nga adda kumplot ti suspetsa a nangipasaanna kadagiti nadukotna.

Itay nabiit, maysa met a lalaki a nangibaga a taga-Pug-os, Cabugao ti natiliwan a nagdukot iti maysa a galieraan iti Ilocos Norte.

Naammuan a binugbog dagiti mannadi ti mannipdut sakbay nga indatagda iti polis.#