Manong, Manang Polis ti I. Sur, tumulong iti Brigada Eskwela

CAMP ELPIDIO QUIRINO, BANTAY, Ilocos Sur – Tumulong ti kapolisan ditoy iti pannakaisayangkat iti Brigada Eskwela tapno maisagana dagiti pagadalan iti masungad a panaglulukat ti klase inton umay a bulan.

Daytoy ti paset ti pammilin ni Provincial Director Senior Supt. Virgilio Fabros kadagiti hepe dagiti nadumaduma a police stations iti probinsia.

Imbilin ni Fabros kadagiti COPs ti pannaka-mobilize ni Manong ken Manang Polis tapno tumulongda iti pannakaisagana dagiti pagadalan para iti school opening a mangrugi no Hunio 1 daytoy a tawen.

Inggunamgunam ni Fabros ti pannakikoordinar dagiti COPs kadagiti agtuturay dagiti pagadalan wenno iti presidente ti Parent Teachers Community Association (PTCA) para iti pannakipartisiparda kadagiti aktibidad para iti pannakaisagana dagiti pagadalan publiko iti sakupda iti masungad a panaglulukat ti klase.

Intuding ti Department of Education ti pannakaisayangkat ti Brigada Eskwela wenno National School Maintenance Week iti Mayo 18-22 babaen ti DepEd Order 25, s. 2009.

Maysa nga school-based a programa ti maintenance ti Brigada Eskwela no sadino nga itulong amin dagiti stakeholders iti edukasion ti tiempo, kabaelan ken resourcesda tapno masigurado a nakasaganan dagiti pagadalan publiko para iti panaglulukat inton Hunio 1.

Segun ken ni DepEd Secretary Jesli Lapus, makalawas daytoy nga aktibidad a no sadino a dagiti lokal a komunidad, nagannak, alumni, grupo sibiko, lokal a negosio, non-government organizations, pribado a tattao ken uray dagiti mangisursuro ken estudiante ket iboluntarioda ti tiempoda ken kabaelan nga agtarimaan ken mangisayangkat iti maintenance work kadagiti pagadalan.

Idi napan a tawen, pinirmaan ni Lapus ti DepEd Order 24, s. 2008 a mang-institutionalize iti Brigada Eskwela wenno ti National Schools Maintenance Week (NSMW).

Sagudayen ti order a maiwayat ti BE wenno NSMW kadagiti amin a public elementary ken secondary a pagadalan iti intero a pagilian dua a lawas sakbay ti panaglukat ti klase adda man wenno awan ti memorandum nga iyisio ti DepEd.#