Mayor, naikkan bileg nga umutang iti bangko para iti nalawlawa a serbisio ti Cabugao Waters

CABUGAO, Ilocos Sur – Umutang manen ti gobierno munisipal ditoy para iti pannakaidanon ti nalawlawa a serbisio ti danum kadagiti dadduma a barangay ditoy nga ili.

Iti sessionda itay Septiembre 14, inted ti sangguniang bayan ti autoridad ken ni Mayor Diocaesar Suero nga umutang ti gobierno munisipal iti Land Bank of the Philippines iti P18 milion para iti pannakailawa ti serbisio ti danum ti Cabugao Waters para kadagiti agnaed iti Barangay Maradudon, Catucdaan, Caellayan, Alinaay, Sisim, ken Baclig.

Segun ken ni Nestor Somera, hepe ti Cabugao Waters, manamnama ti kanayonan a 300 a consumers iti pannakaidanon ti serbisio ti danum kadagitoy sumagmamano a barangay.

Kinuna ni Somera nga addan 1,819 a serserbian ti Cabugao Waters manipud iti sigud a 1,500 a consumers.

Sakbay ti pannakaaprobar ti resolusion a mangted iti bileg ken ni Suero nga umutang iti LBP, naglasat daytoy iti nabara a diskusion iti konseho.

Sumagmamano a konsehal ti nangipeksa iti reserbasionda iti iyuutang manen ti gobierno munisipal iti baet a mangrugin daytoy nga agbayad iti P35 milion nga utangna iti bangko para iti pannakapasayaat ti serbisio ti danum ti Cabugao Waters.

Agdagup iti P6 milion ti tinawen a bayadan ti gobierno munisipal iti las-ud ti 15 a tawen.

Naammuan a nakapastrek ti Cabugao Waters iti P2 milion iti makatawen ket ibaklay ti gobierno munisipal ti P4 milion iti tinawen a pagbayad iti nasao nga utang.

Ngem impasingked ti maysa nga opisial ti LBP a sisasagana ti bangko a mangpautang iti gobierno ti Cabugao iti P18 milion a mabayadan iti uneg ti 15 a tawen.

Adda idi singasing nga ingato ti Cabugao Waters ti singirna iti danum ngem sinupiat dagiti konsehal agsipud iti mapapati a saan nga episiente a panagkolekta iti singir iti danum ken adu dagiti customer a delingkuente nga agbayad iti makunsomada a danum.

Idi damo, P15 milion ti naidatag nga utangen ti gobierno munisipal ngem nanayonan iti P3milion idi kinuna ti Cabugao Waters a dakdakkel ti mabusbos iti pannakaidanon ti danum iti sumagmamano a barangay daytoy nga ili.#