Medalia para Quirino awardees, natengngel gapu iti politika?

VIGAN CITY – Imbes a medalia, sertipiko ti pammigbig laeng ti naiyawat kadagiti Pres. Elpidio Quirino awardees idi Nobiembre 16 gapu iti mapapati a politika.

Kinuna ni Vice Governor Jerry Singson bayat ti programana a “JCS: Kakibin ti Balligi” a nagsuspetsa ti administrasion a sabali ti partido ni Cory Aquino, apo daydi nag-Presidente Quirino, ket mapapati a natengngel ti panangidonar ti Central Bank of the Philippines iti medalia a maiyawat koma kadagiti Quirino awardees iti maysa a programa iti kaaldawan ti pannakalagip ti panagkasangay daydi Apo Pidiong.

Idi napan a tawen, imparipirip ni Cory Aquino ti panggepna nga agkandidato a para senador, segun ken ni Singson.

Ngem kinuna ti bise gobernador nga awan pay ti imbagbaga ti apo ni Cory mainaig iti panggepna iti politika iti masungad nga eleksion.

Saan a nakadar-ay ni Cory Aquino iti pannakalagip iti panagkasangay daydi Apo Pidiong ket patien ni Singson a ti kaawan ti medalia para kadagiti awardees ti nagbainanna nga immay.

Kinuna ni Singson a gapu iti nagan ti apo daydi Apo Pidiong a kunana a “Cory magic”, naintriga ti pamilia Quirino.

Tinawen a maselebraran ti panagkasangay ni Quirino ket naideklara pay daytoy nga aldaw a maysa a public holiday iti probinsia.

Bayat ti programa a naangay iti sanguanan ti provincial capitol, nagpadispensar ni Eddie Quirino, sabali pay nga apo ni Apo Pidiong, gapu iti saan a pannakaiyabot dagiti medalia para kadagiti awardees gapu iti mapapati a pannakapolitikana.

Kinuna ni Singson a nalawlawagan met laeng daytoy nga isio ket intuloy met laeng ti Central Bank ti nagpaaramid iti medalia ket masuktanto met laeng ti sertipiko a naiyawat kadagiti awardees iti medalia.

Karaman dagiti napada-yawan iti daytoy nga aldaw ni Maximo Rabanal, Gawad Saka national awardee kas Outstanding Corn Farmer of the Year ken taga-Pantay Daya ditoy siudad ti Vigan.

Kinuna ti bise gobernador a saan koma a malaokan iti politika ti kastoy a pagteng ta saan a napintas a kitaen.#