Nadumaduma a gunglo dagiti Filipino iti Hawaii, nagur-or para kadagiti biktima ti bagyo

HAWAII – Nagtitipkel dagiti nadumaduma a gunglo dagiti Filipino ditoy para iti pannakaur-or iti pondo a maisaranay kadagiti kailianda a biktima ti bagyo.

Kinuna ni Jun Colmenares, General Chair ti Ad Hoc Relief Drive, nga agdagup iti $24,495.87 ti naur-orda iti relief drive a naisayangkat iti Oahu itay Oktubre 4 ket no mairaman ti naukkonda iti FilCom Center, agdagupen iti $38,406.14 ti naur-or dagiti nadumaduma a gunglo dagiti Filipino ditoy a maisaranay kadagiti kailianda iti Filipinas a dinidigra ti bagyo.

Sangsangkamaysa dagiti nadumaduma a gunglo dagiti Filipino ditoy a pakairamanan ti Congress of Visayan Organization, Philippine Consulate General, Philippine Celebrations Coordinating Committee of Hawaii, United Filipino Council of Hawaii, Oahu Filipino Community Council, Filipino Chamber of Commerce, Honolulu Filipino Junior Chamber of Commerce, Order of Knights of Rizal, Hawaiian Lodge of Free and Accepted Masons, Ilocos Surian Association of Hawaii, ken dadduma pay a gunglo a nakitinnulong iti panagur-or iti pondo babaen ti Philippine Typhoon Relief Drive nga insayangkat ti Filipino Community Center.

“Makipartisipartayo. Itedtayo ti ayat, saranay ken tulongtayo,” kinuna ni Eddie Agas, Sr., presidente ti UFCH.

“Dawatek a tunggal unit organizations ti OFCC ken kamengda ket makipagrikna ken makisinnaranayda itoy a gannuat para kadagiti nabiktima ken dagiti pamiliada,” kinuna ni Danny Villaruz, presidente ti Oahu Filipino Community Council ken Ilocos Surian Association of Hawaii.

“Uray bassit no agtaud iti kaunggan ti puso, dakkelen a banag dayta a maitulong,” kinuna da Jesse Pascual ken Fe Velasco, agpada nga opisial ti Divine Word College of Laoag College Alumni Association of Hawaii.

“We are very appreciative of the efforts of the Filipino and the larger community here in Hawaii in providing assistance to the Filipino people at this time of great need,” kinuna ni Philippine Consul General Leoncio Cardenas sana innayon a naan-anay ti suportada ken tumulongda iti pannakaiduron dagitoy a gannuat.

Kinuna ni Colmenares a mayawat ti naur-or iti Caritas ken iti Consuelo Foundation tapno maidanon kadagiti maseknan a pagpaayanna.

Agpatingga ti relief drive iti Oktubre 24, 2009. Iturong dagiti donasionyo iti Filipino Community Center, 94-428 Mokuola St., Suite 302, Waipahu, Hawaii 96797 wenno kadagiti sanga ti Central Pacific Bank ken Golden Coin Restaurant para iti Philippine Relief Fund Drive.#