Nagdan-aw a pakaibalayan ti convention center, masuspetsa a nagtaudan ti dengue

VIGAN CITY – Ti nagtagidan-aw a lote a plano ti gobierno probinsial a pakaipatakderan iti convention center ti suspetsaen ti maysa nga ina a nagtaudan ti dengue a nakayospitalan ti anakna.

Naammuan iti report manipud iti DWRS itay Hulio 16 a tallo a pasiente ti naiserrek iti Gabriela Silang General Hospital gapu iti sakit a dengue a pakairamanan ti maysa a barito nga agnaed iti kadre nga asideg iti nagbalinen a dan-aw a lote a nakali a pakaipatakderan koma ti maysa a convention center ngem naisardeng gapu iti kaawan ti pondona.

Iti interbio ti reporter ti nasao nga estasion ti radio iti ina ti biktima, nakunana a suspetsana a ti nagdan-aw a lote iti asideg ti kadre a pagnaedanda ti nagtaudan ti dengue a nangbiktima iti anakna.

Sakbayna, impeksa ni Mayor Eva Marie S. Medina ti posible a pannakaapektarda nga agnaed iti Barangay Tamag agraman dagiti agbasbasa iti University of Northern Philippines no adda agsakit iti dengue gapu iti nagdan-aw a kali.

“… Saan laeng a datayo nga agindeg ditoy Tamag ti maapektaran no di pay dagiti agbasbasa iti University of Northern Philippines… No adda maapektaran ditoy, siempre agwara iti sabali a lugar pay,” kinuna ti mayora iti interbiona iti DWRS idinto nga insingasingna a mapuruakan laengen ti nagdan-aw a lote iti tilapia tapno maprobetiar daytoy ken adda pay pagbanniitan dagiti tattao.

Kanaig daytoy, iti maysa nga interbiona iti radio, inannugot ni Gov. Deogracias Victor Savellano nga ibirbirokanda pay laeng iti pondo ti nasao a convention center.

Kas reaksionna iti singasing ni Medina, kinuna ti gobernador a papuruakanna iti tilapia ti nagdan-aw a lote agraman ti plaza lagoon.

Idi kanikadua a tawen, pinakali ti gobierno probinsial ti nasao a lote a plano a pakabangonan ti convention center iti baet a ditoy ti pakaipatakderan ti pagkarnabalan iti panangselebrar ti Vigan City iti Konbersion ni San Pablo tunggal Enero 25.

Gapu iti daytoy, kapilitan nga inyalis ti gobierno ti siudad ti pagkarnabalan iti Barangay IV.

Ngem kalpasan ti pannakakali ti lote, saanen a naituloy gapu iti kaawan ti pondona.#