Footer

Nanggudas iti maysa a balo, di pay ammo ti kinasiasinona

CAOAYAN, Ilocos Sur – Saan pay nga ammo ti motibo ti pannakapapatay ti maysa a balo idi agsapa ti Marso 16 sadiay Barangay Naguilian ditoy nga ili.

Kasta met a di pay ammo no asino ti nanggudas ken ni Rolly Lazo y Quiba, 51, residente iti Barangay Anonang Mayor ditoy nga ili.

Ngem kitkitaen dagiti polis no adda pannakainaig ti pammaltog iti mapapati nga illegal nga aktibidad ti biktima. Kas nailanad iti journal, adda kaso ti panagtakaw a nakainbolbaran ti biktima.

Iti inisial a panagimbestiga dagiti polis, idi agarup 5:10 ti agsapa ti nadakamat a petsa, napan gimmatang ni Lazo iti pandesal iti James Bakery ket bayat ti kaaddana iti uneg ti bakery, inasitgan ti di pay nabigbig a suspek sana pinaltogan iti namindua a daras ti ulo ti biktima a puon ti dagus a pannakatayna.

Kalpasan ti pammaltog, naglugan ti suspek iti di ammo a klase ti motorsiklo ket naglibas iti laud a direksion.

Mapapati a cal. 45 ti naaramat iti pammaltog kas maibasar iti dua a kapsula ken maysa a deformed slug ti nadakamat a paltog iti nakapasamakan iti krimen.

Addan iti kustodia ti Ilocos Sur Crime Laboratory dagitoy idinto nga agtultuloy ti panagimbestiga dagiti polis mainaig iti nasao a pammapatay. (Tawid News Team)