Footer

Nataktak pannakasimpa kalkalsada gapu’t panagtudotudona: District Engineer

CANDON CITY – Kinuna ti district engineer iti maikadua nga engineering district a ti panagtudotudona ti makagapu iti pannakataktak iti pannakasemento dagiti kalsada iti maikadua a distrito.

“Mataktaktayo bassit ta ditayo met makapagtrabaho no agtudtudo ta madadael ti pannakabase ti masimsimpa a kalsada,” kinuna ni District Engr. Ray Elaydo iti maikadua nga engineering district iti probinsia bayat ti interbio kenkuana ti DZTP itay nabiit.

Daytoy ti reaksion ni Elaydo kadagiti adu a complaint manipud kadagiti commuters a pakairamanan dagiti estudiante, mangisursuro, negosiante ken biahero gapu iti nabuntog a panaguyas ti trapiko kadagitoy makalkalsada a paset ti national highway iti maikadua a distrito.

Maysa a biahero ti nagkuna a nabuntog unay ti pannakaitrabaho dagiti matarimaan a kalsada a mangmangted iti perhuisio iti riding public.

Sabali laeng dagiti complaints manipud kadagiti adda luganna iti kaawan dagiti naan-anay a warning signs sakbay dagiti masimsimpa a kalsada a pakaigapuan dagiti aksidente.

Ngem indagadag ni Elaydo ti panaganus ti riding public iti panagbiaheda agsipud ta adu ti matrabtrabaho a kalsada iti maikadua a distrito.

Kinuna ti district engineer a babaen ti initiatibo ni Cong. Eric Singson, naikkan iti pondo dagitoy a kalsada iti sakup ti maikadua a distrito ti Ilocos Sur.

Innayon ni Elaydo nga inyunay-unayna kadagiti kontraktor iti panangipasdekda iti naan-anay a warning signs kadagiti masimsimpa a kalsada agsipud ta importante dagitoy a mangballaag kadagiti motorista tapno agannadda ken maiyadayoda iti aksidente.

Pakairamanan kadagiti madama a masimsimpa dagiti kalsada a sakup iti Tagudin, Santa Cruz, Santa Lucia, Candon, Santiago, San Esteban, Santa Maria, Narvacan ken Santa.#