Night swimming, nagtungpal iti trahedia

CAOAYAN, ILOCOS SUR- Trahedia ti nagtungpalan ti night swimming dagiti agbabarkada idi Septiembre 9 iti kabaybayan a sakup ti Barangay Fuerte ditoy idi nalmes ti dua a lallaki a kaduada.

Nasarakan ti bangkay ni Max Francis Palamo, 18, residente iti Zone 4, Bantay, Ilocos Sur nga impaigid ti dalluyon iti agsapa ti Septiembre 11 iti sakup ti Villamar, maysa ket kagudua a kilometro ti kaadayona iti Barangay Fuerte a nakalmesanda ken ni Edcel Sy, 26, naasawaan, residente iti Bonifacio Street, Vigan City.

Iti pannakaisurat daytoy, saan pay a nasarakan ti bangkay ni Sy ngem pattapatta dagiti bumarangay a saan nga umadayo ti bangkay ti biktima iti nakakitaan iti bangkay ni Palamo.

Segun iti report manipud iti polis ditoy nga ili, nagturong ti grupo nga adda kaduada a dua a babbai iti Fuerte Beach iti pasado alas onse iti rabii ti Septiembre 9 tapno ag-night swimming kalpasan ti mapapati a panaggiinomda iti Vigan City.

Naammuan iti report a timmapog ni Sy iti baybay ket mapapati a ginuyod ti napigsa a koriente.

Immarayat ni Palomo ngem mapapati a naikaglis iti seawall ket nairaman a ginuyod ti koriente.

Nagpatulong kadagiti kakaduada kadagiti bumarangay ngem saan a kinabaelan dagiti immarayat ti nagsapul gapu iti kinadakkel dagiti dalluyon.

Nadawel ti baybay iti dayta a rabii gapu iti Bagyo Maring, segun ti maysa nga agnaed.

Naibayog ti Signal No. 1 iti Ilocos Sur gapu iti Bagyo Maring.

Daytoy ti maikadua a report ti pannakalmes ditoy probinsia iti las-ud ti makalawas.

Nalmes ni Richard Jomar Chan, 15, agbasbasa iti Divine Word College of Vigan bayat ti panagdidigosda iti malem ti Septiembre 5 iti kabaybayan a sakup ti Sta. Catalina, Ilocos Sur.

Nasarakan ti bangkay ti estudiante iti bigat ti Septiembre 6 iti kabaybayan a sakup ti San Vicente, Ilocos Sur.

Mapapati a ginuyod ti napigsa a koriente ti danum. ni Chan.#