NSCC, sinelebraranna maika-17 a tawenna

CAOAYAN, Ilocos Sur -Inselebrar ti Nueva Segovia Consortium of Cooperatives (NSCC), ti grupo ti ag-80 a primary cooperatives iti Rehion 1, 2 ken CAR, ti maika-17 a tawen nga anibersariona idi Setiembre 17 ditoy nga ili.

Iti eksklusibo nga interview ti NBN Vigan ken ni Divina Quemi, CEO ti NSCC, impalgak daytoy nga idi nangrugi ti sugponan idi 1992, umabot laeng iti P13,500 ti nangrugiananna a pondo. Kalpasan ti 17 a tawen, nasuroken a P260 milion ti pondo ti NSCC ket targetda pay a paaboten iti P300 milion sakbay nga aggibus daytoy a tawen.

Pinagyamanan ni Quemi ti suporta dagiti miembro ta dagitoy ti makaigapu iti panagballigi ti kooperatiba iti laksid ti rigat ket pannubok a naglabasanna.

Iyaw-awis pay ti CEO ti panagkameng dagiti sugponan ken indibidual a mayat nga agbalin a miembro ti NSCC. Para iti kooperatiba, kasapulan laeng ti panagbayad iti P500 a registration fee ken P1,000 kas inisial a sugpon ket maaddaan payen iti voting power daytoy iti general assembly. Para met iti indibidual, P75 laeng ti kasapulan nga initial a sugpon.

Inwaragawag ni Quemi a dandanin malpas ti baro a pasdek ti NSCC iti ili a Caoayan a maawaganto iti NSCC Plaza. Agbalinto a commercial complex ti umuna a kadsaaran, hostel ti maikadua idinto a function hall nga addaan iti kapasidad a 1000 ti maikatlo.

Kabayatanna, indagadag ni Evelyn Nuñez, Cooperative development specialist ti CDA Regional Office, kasapulan a mairehistro manen tapno mapabaroda amin a kooperatiba nupay siguden a nairehistroda iti babaen ti R.A. 6928.

Kinuna ni Nuñez a kadagiti aktibo a kooperatiba, kasapulan nga ipasada ti orihinal a kopia ti certificate of registration, photocopy ti articles of cooperation and amendments, kaudian nga audited financial statement, registration fee a P500 ken P15 para iti documentary stamps.

Kadagiti non-operating a kooperatiba, masapul ti ipapanda iti regional office tapno mabaliwan ti status ti kooperatiba sakbay nga idatag dagiti dokumento idinto a dagiti kanseladon ken natayen a kooperatiba, kasapulanen a mairehistro kas baro.#