Oplan Kandado: 4 pasdek-negosio, napaserraan

CANDON CITY – Uppat a dadakkel a pasdek-negosio ditoy siudad ti pinaserraan ti Bureau of Internal Revenue (BIR) iti insayangkatda nga Oplan Kandado itay Septiembre 29.

Karaman dagiti pasdek-negosio a napaserraan ti Pinatubo Trading ken dagiti sangana ken ti Dā€™ Partners a masarakan ditoy siudad ken ti Arcenas ken Nesty Hardware iti Tagudin, Ilocos Sur.

Indauluan da Atty. Ronald Querof, hepe ti legal division ti BIR, ken ni Imelda Bueno, District Revenue Officer a mangsakup iti Ilocos Sur ti Oplan Kandado a naisayangkat kadagiti nasao a pasdek-negosio.

Segun ken ni Bueno, napaserraan dagiti uppat a business establishments gapu ta imbabada ti deklarasionda iti naglakuanda iti nasurok a 30 porsiento.

Inlawlawag met ni Querof nga insayangkatda ti Oplan Kandado kas maibatay iti memorandum order nga impaulog ti komisioner ti BIR.

Kinuna ni Querof a napaserraan dagiti nadakamat a pasdek-negosio agsipud iti panaglabsingda iti national internal revenue code.

Naggigiddan ti panangipakat ti BIR iti daytoy nga aldaw ti Oplan Kandado iti Ilocos Norte, La Union ken ditoy probinsia.

Naammuan ti Tawid News nga immuna nga impakat ti BIR ti Oplan Kandado iti probinsia ti Pangasinan.#