Oposision iti Vigan, dida pinasanguan anak ni Chavit

VIGAN, Ilocos Sur – Kinuna ti deputy national security adviser nga impasingked dagiti kameng ti oposision a dida patakderan iti sumango ken ni Ryan Luis nga anakna no isu ti agtaray a para bise mayor ditoy siudad.

Iti pannakipatpatang ni Usec. Luis “Chavit” Singson ken ni Romeo Reynon Ramos, host ti programa a Barangay Commando Brigada itay nabiit, impalgakna a saan a simmupiat iti dayta a kiddaw ti oposision nupay “saan koma nga agtaray” ti anakna a kas katiket ni Mayor Eva Marie S. Medina iti babaen ti Lakas-Kampi-CMD.

Kinuna ni Singson a yantangay naggapu ti kiddaw iti oposision, imbagana kadakuada nga awan ti objectionna iti panagtaray ni Ryan Luis a para bise mayor.

Uray ni Medina ket awan ti kasangona iti panagpailayonna a kas mayor ti Vigan.

Segun iti dati a gobernador, ipamaysa ni Ryan Luis ti panagdur-as ti turismo ditoy a siudad.

“Iti sabali a pagilian, billion dollar industry daytoy (turismo),” kinuna ni Singson idinto nga innayonna a no mapadur-as ti turismo iti Vigan City, “dakkel unay ti epektona iti siudad.”

Kinuna ni Singson a “napintas daydiay a programa ken pangalaan ni Ryan Luis iti eksperiensana, ket no saan a successful (iti gannuatna), aglusulos a sigida.”

Innayon ni Singson nga uray awan ti kasango ti anakna, inyunay-unayna ti panagpasiar daytoy tapno ipakaammona kadagiti tattao daytoy a programana tapno dawatenna ti tulong dagiti agnaed mainaig iti pannakapadur-as ti turismo.#