Footer

P461-M pategna a droga, nakumpiska, 30 natiliw iti Cordillera iti 1st quarter: PDEA

BAGUIO CITY – Nasurok a P461 milion nga agduduma a klase ti droga ti nakumpiska idinto a nasurok a 30 dagiti natiliw gapu iti pannakainaigda iti illegal a droga iti Cordillera iti umuna a tallo a bulan daytoy a tawen, segun iti report itay nabiit manipud iti Philippine Drug Enforcement Agency.

Kinuna ni Chief Inspector Edgar Apalla, officer in charge ti PDEA iti Cordillera, nakumpiska dagiti droga ken naaresto dagiti drug pushers, dealers ken transporters babaen ti 27 nga operasion nga insayangkat dagiti polis iti first quarter ti 2009.

Kinuna ni Apalla a nakasamsam dagiti polis kadagiti insayangkatda nga operasion iti agdagup iti 127,550 grams a marihuana, 8.1 grams a shabu, 1,310,740 fully-grown marijuana plants, 111,196 half-grown marijuana seedlings, 3,500 grams of marijuana seeds, 20,001.7 grams a napagango a marihuana, 1,322.6 grams of hashish wenno concentrated marijuana resin, ken 209,916.75 grams a marijuana bricks.

Segun iti rekord manipud iti PDEA, kaadduanna kadagiti droga ti nakumpiska babaen dagiti checkpoints nga impasdekda ken iti pannakaaresto dagiti am-ammo a kameng ti grupo ti droga babaen ti buy-bust operations nga insayangkatda kadagiti nairaman iti target watch list dagiti drug personalities.

Kinuna ni Apalla nga immadu dagiti naaresto gapu iti droga agsipud kadagiti impormasion ken pannakitinnulong dagiti umili iti kampania ti kapolisan maikontra iti panagraira iti droga.

Bunga daytoy iti naing-inget a kampania iti information dissemination nga inangayda kadagiti nadumaduma a pagadalan iti rehion, segun ken ni Apalla.#