VIGAN CITY – Agpateg iti P500,000 dagiti agas a pakairamanan pay ti dextrose, vials, antibiotics, ken syringes ti inyawat itay nabiit ni Gov. Deogracias Victor “DV” Savellano iti provincial health office tapno adda usaren dagiti indigents a pasiente.
Inyawat ti gobernador dagiti agas ken ramramit kalpasan ti pannakitaripnongna kadagiti dodoktor dagiti nadumaduma a district hospitals a naangay iti GSGH ditoy itay nabiit.
Kinuna ti gobernador a para iti emergency cases dagiti naiyawat nga ag-agas a maipaay kadagiti agkasapulan a kakailian.
Kinuna ni Savellano a masapul a saganaan ti climate change nangruna iti isasangbay ti matutudo ket kangrunaan a pakaipaayan dagiti agas kadagiti agkasapulan nga emerhensia dagiti indigents.
“Dagiti pasiente a kayada ti agbayad, siempre, agbayadda tapno di maparigatan daytoy agpateg iti P500,000 nga ag-agas,” nakuna ni Savellano bayat ti interbio kenkuana ni Peter Rebunal ti DWRS.
Kangrunaan a natratar iti miting ti gobernador ken dagiti dodoktor dagiti measures nga iwayat dagiti district hospitals no makastrek ti A H1N1 ditoy probinsia.
Kinuna ni Savellano a napinalen dagiti aramiden ti probinsia inkaso nga adda agsakit iti A H1N1 ket adda dagiti procedures nga insagana ti provincial health office no makastrek daytoy a virus iti probinsia.
Impalgak ti gobernador a nakaala iti agas para iti nasao a sakit manipud iti regional health office.
Kabayatanna, kinuna ni Dr. Carmeliza Singson, dadaulo ti GSGH, a dagiti laeng indigents a sertipikaran ti provincial social welfare and development office ti pakaipaayan a libre dagiti inawatda nga agas.
Sumaruno a maikkan iti agas dagiti amin a district hospitals iti probinsia tapno adda usaren dagitoy kadagiti pasienteda, segun iti gobernador.#