Pagadalan dagiti nataengan, nairugi daytoy a tawen

BURGOS, Ilocos Sur – Uray babbaket ken lallakaydan, mabalinda ti sumakdo iti adal iti babaen ti Alternative Learning System (ALS), maysa a programa ti Department of Education para kadagiti nataengan, segun iti prinsipal ti maysa a pagadalan ditoy nga ili.

Kinuna ni Robert Rosales, prinsipal ti Bessang Elementary School, uray dagiti agtawenen iti nasurok a 60 ket mabalinda ti agbasa iti babaen ti ALS.

Impalgak ni Rosales nga iti agdama, adda aganay a 30 nga estudianteda iti babaen ti nasao a programa a ti kaubingan ket agtawen iti 17 idinto a 69 ti kalakayan.

Innayon ti prinsipal a kaadduanna kadakuada dagiti out-of-school youth nga agindeg iti Barangay Bessang ken Mapanit ditoy nga ili a nagsardeng idi nga agbasa ngem ituloyda itan ti panagbasada gapu ta naamirisdan ti kinapateg ti adal.

Kabayatanna, kinuna ni Jocelyn Gadiano Derecto, mangisursuro iti ALS, a masapul a maipasa dagiti sumrek iti daytoy a programa ti equivalency test iti elementaria wenno high school tapno maalada ti diplomada.

Nairugi ti ALS ditoy iti daytoy a tawen tapno maikkan iti gundaway dagiti nataengan a makagun-od iti diploma.#