Pagadalan, sinuspendena ti klase gapu iti AH1N1

CANDON CITY – Maysa a pagadalan ditoy siudad ti nangsuspende iti klase kalpasan a nakumpirma nga adda maysa nga estudiante ditoy a nagpositibo iti AH1N1.

Imparuar ni Sister Azucena Nate, school directress ti St. Joseph Institute ditoy siudad ti suspension ti klase itay Hulio 17 ken 20 kas precautionary measure kalpasan a nagpositibo ti maysa nga estudiante ditoy a pagadalan iti sakit nga AH1N1.

Nupay kasta, kinuna ni Dr. Narciso Ramos, city health officer, a naimbaganen ti pasiente a nagpositibo iti AH1N1. Saan nga impalgak ti doktor ti kinasiasino ti estudiante ken ti pagnaedanna.

Mapapati a naala ti biktima ti sakitna iti kaarrubada a naggapu iti sabali a pagilian.

Kinuna dagiti opisial ti SJI a kas preventive measure, mapagbakasion iti sangapulo nga aldaw ti asinoman nga estudiante a pakakitaan kadagiti sintomas ti AH1N1 tapno saan nga agwaras ti virus iti pagadalan.

Kanaig daytoy, naangay ti maysa a miting a dinar-ayan dagiti health officials ti rehion ken ditoy siudad, ni Dr. Osias Diasen, chair ti committee on health ti sangguniang panlungsod, opisial ti DepEd Candon City, Dr. Manuel Cadacio ti SJI, sanitary inspectors, ken dadduma pay tapno iwayatda dagiti addang tapno malapdan ti panagwaras ti AH1N1 ditoy siudad babaen ti pannakaipakat dagiti preventive measures, panagaramat iti thermal scan kadagiti estudiante ken pannakaipakat ti self-quarantine kadagiti pakakitaan iti sintomas daytoy a sakit.

Kabayatanna, naammuan ti DZTP nga iti rekord ti Department of Health ditoy siudad, malaksid iti maysa a kumpirmado a nagpositibo iti AH1N1 virus, adda innem a pending a kaso a maob-obserba idinto a dua ti nagnegatibo ken nakarekobren ti pito a nakakitaan iti sintomas daytoy a sakit.

Impakaammo pay ni Ramos a na-reactivate ti Barangay Health Emergency Response Team a mangidanon kadagiti impormasion maipanggep iti AH1N1 kadagiti nadumaduma a barangay ditoy siudad ken no kasano a malapdan ti pannakakapet iti nasao a sakit.

Naipasdek ti BHER para iti information dissemination idi 2003 idi nagraira ti Severe Acute Respiratory Syndrome (SARS) iti South East China.#