Footer

Panagtrabaho nga awan kasukatna, panagbuteng iti Dios ti sekreto daytoy outstanding policeman ti rehion

BANTAY, Ilocos Sur – napudno a panagtrabaho a di mangnamnama iti kasukatna ken panagbuteng iti Dios ti imbatad ti maysa a polis a rason iti pannakapadayawna a maysa kadagiti sangapulo a pagwadan a polis iti rehion.

“Masapul nga agtrabahotayo nga awan ti kasukatna,” kinuna ni SPO3 Edmund Artates iti interbio kenkuana ni Eugene Paet ti DWRS itay nabiit.

Karaman da Artates ken ni Supt. Ricardo Dayag, pangulo ti 103rd Provincial Mobile Group ti Ilocos Sur Police Provincial Office kadagiti 10 a napadayawan nga outstanding policemen ti Region I itay nabiit.

Insayangkat ti Police Regional Office Region I babaen ti pannakikammayyet ti Rotary Club District 3790 ti pannakapili dagiti 10 outstanding policemen iti rehion a nairusat idi Nobiembre idi napalabas a tawen.

Naited ti pammadayaw kadagiti napili a polis idi February 20, 2009 iti La Union Provincial Capitol. Immawat dagiti napadayawan iti P20,000 a gunggona ken plake ti pammadayaw.

Segun ken ni Artates, ti napudno a panagtrabaho ken panagbuteng iti Dios ti sursurotenna iti panagserbina a kas polis.

“Dapat nga agtrabahotayo nga awan ti kasukatna no di laeng ti bukodtayo a sueldo ken intay paglingling-etan,” kinuna ni Artates

Kabayatanna, kinuna met ni Dayag nga iti kaadun ti pammadayaw a naawatna, ibilangna ti pannakapilina a maysa kadagiti most outstanding policemen iti rehion a kapatgan kenkuana.

Kinuna ni Dayag a patas ti panangipakatna iti linteg.

“Trabaho laeng,” kinuna ni Dayag.

“Napintas daytoy nga investment ti Rotary… panangited iti enerhia ken kuarta iti maysa a proyekto a mangted motibasion kadagiti polistayo; ti pannakairakurak iti sangalubongan a maipagpannakkeltayo ti Philippine National Police,” kinuna ni Rotary District Governor Jesus Nicdao .

Dagiti dadduma pay a napadayawan: Monaliza Asis, pangulo ti Family, Juvenile, Gender and Development (FJGAD) branch ti PPO Pangasinan; Buenaventura Benavides III ken Arturo Melchor ti Investigation and Detection Management branch ti PPO Pangasinan, ken Ruth Poserio ti Sta. Barbara, Pangasinan Police Station; Julius Suriben, Regional Investigation and Detection division ti PRO1; Ismael Gauna ti Bacnotan, La Union Police Station; Eleuterio Pajo Jr. ti Regional Mobile Group 1; ken Eric Hilario of Ilocos Norte Police Provincial Office.

Automatiko a nominado dagiti napadayawan iti nasional a panagbirok kadagiti outstanding policemen nga isayangkat ti Rotary ken ti Metrobank Foundation.#