Footer

Panagyaman, saan a komendasion ti maited iti BFP

VIGAN CITY – Saanen a komendasion no di ket “panangiyebkas iti panagyaman” ti maipaay kadagiti kameng ti Bureau of Fire Protection ditoy ken dadduma pay a nagresponde iti pannakauram iti maysa a pasdek ditoy siudad iti itatapog ti baro a tawen.

“Expression of gratitude” itan ti titulo ti resolusion nga inesponsoran da ABC Federated Presidente John Patrick Singson ken SK Federated Presidente Edree Jeremiah Pajaro ti maited iti BFP Vigan, Candon City, Caoayan, Sta. Catalina, Magsingal, Narvacan ken Sta. Maria, pakairamanan dagiti pribado a negosio a kas iti JTC Mall ken Northern Tobacco Redrying Corporation.

Nagbaliw metten ti takder ni Konsehal Benjo Verzosa kalpasan ti pannakasukat ti titulo ti nasao a resolusion.

Nagbalin a nabara ti deliberasion iti nasao a resolusion itay napan a session agsipud iti saan a panangkanunong ni Konsehal Benjo Berzosa iti pannakaited iti komendasion iti BFP Vigan agsipud ta saan pay a panawen a maikkanda iti sanguanan ti idadatag ti maysa a kameng ti pamilia ti natay iti pannakauram ti FQ Store idi tumapog ti baro a tawen a nangbabalawanna iti BFP gapu iti mapapati a saanna a panagresponde a dagus para iti pannakadepdep ti uram.

“Trabahoda daydiay,” kinuna ni Verzosa kas panangibatadna iti saanna nga ikakanunong iti pannakaited iti komendasion kadagiti bombero.

Inkalintegan ni Quibilan a rumbeng a maited ti komendasion gapu iti nadaras a pannakadepdep ti apuy ket saan a nagramaram ti uram kadagiti kaabay ti FQ Store a pasdek.

Dimmapo ti tallo a kadsaaran a pasdek a nakaibalayan ti FQ Store ket nairaman a nauram ni Florencio Sy Que, 62, akinkukua iti pagtagilakuan.

Mapapati a nagtaud ti uram iti ibebettak dagiti nakadispley a tagilako maigapu iti kuitis a maipagarup a sinindian ti maysa a reveller kas panangsabatna iti isasangbay ti baro a tawen.

Nakasuan iti arson resulting to homicide ni Richard Pugal, 21, baro, residente iti Barangay Capangpangan gapu iti nasao nga insidente.

Sinegundaran a dagus ni Verzosa ti mosion ni Singson a maaprobaran ti resolusion idinto nga insingasing ni Konsehal Loreto Quibilan nga agbalin amin a kameng ti Konseho a co-sponsor iti nasao a resolusion.

Manamnama a maited ti nasao a resolusion kadagiti pangulo ti BFP dagiti nadakamat nga ili ken dagiti fire brigades iti sumaruno a panagsession ti city counsil ditoy.#