Pannakapasayaat security measures pasdek-negosio, imbilin ti PNP provincial director

BANTAY, Ilocos Sur – Imbilin ti PNP provincial director ditoy ti pannakapasayaat dagiti security measures dagiti business establishments iti probinsia iti sanguanan ti nagsaruno a panagtakaw iti dua a rural bank iti Candon City ken Banayoyo itay nabiit.

Imbilin ni Provincial Director Police Senior Supt. Virgilio Fabros kadagiti amin a hepe ti polis iti probinsia ti pannakikoordinarda kadagiti bank managers ken akinkukua kadagiti business establishments para iti pannakaipasdek kadagiti security barriers tapno malapdan dagiti maisayangkat a panagtakaw kadagitoy a pasdek-negosio.

Karaman iti pammilin ni Frbros ti panangisayangkat ti kapolisan iti ocular inspection kadagitoy a pasdek tapno makita no adda met la naiwayatda a security measures.

Imparuar ni Fabros ti pammilin gapu iti nagsaruno a panagtakaw a naisayangkat itay nabiit iti dua a rural bank iti maikadua a distrito.

Natakawan ti maysa a rural bank iti Banayoyo, IlocosSur itay Septiembre 14 babaen kadagiti di pay am-ammo a mannanakaw.

Naireport a kinasakas dagiti mannanakaw ti P248,000 a linaon ti kaha ti nasao a bangko.

Segun iti report, nakastrek dagiti mannanakaw iti uneg babaen ti panangdadaelda iti rehas ti tawa ti nasao a bangko.

Mapapati nga awan ti security guard ken awan ti alarm system ti nasao a bangko.

Immuna ngem daytoy, sinerrek dagiti mannanakaw ti Rang-ay Rural Bank iti Candon City iti tengnga ti aldaw ket kinasakasda ti P500,000 manipud iti teller.

Naammuan iti inbestigasion dagiti polis a dua a lalaki ti simrek iti bangko a nagpammarang a customer idinto a nagbati ti dua a kaduada iti ruar a kas look-out.

Idi addan dagiti mannanakaw iti uneg, dinis-armada ti security guard, innalada ti paltogna sada imbilin iti teller ti panangiyawatna iti kuarta a naggian iti kahana.

Naglibas dagiti mannanakaw a naglugan iti motorsiklo.

Mapapati a naileppas ti panagtakaw iti las-ud laeng ti lima a minutos a naisayangkat bayat ti kaadda dagiti empleado iti ruar tapno mangaldaw.

Nupay kasta, segun kadagiti polis Candon, addan sursurotenda a lead para iti pannakasolbar ti nasao a panagtakaw.

Mapapati nga awan ti naipasdek a kamera iti bangko.#