
SAN JUAN, Ilocos Sur – Kinuna ti maysa nga opisial ti kompania ti sigarilio a saan laeng a dagiti mannalon ti akinrebbeng iti pannakapataud iti nasayaat ti kalidadna a tabako no amin dagiti stakeholder iti industria.
“Saan laeng a responsibilidad dagiti mannalon wenno dagiti LGUs ken ahensia ti gobierno wenno dagiti kom-pania nga agparpartuat ti sigarilio ti pannakapataud ti nasayaat a binulong ti tabako no di dagiti amin nga stakeholders ti industria,” inyunay-unay Chris J. Nelson, managing director ti Philip Morris Philippines Manufacturing Inc. (PMPMI) iti interbio kenkuana ti NBN Vigan itay nabiit.
Kanaig daytoy, maysa a C-48 Model Venture furnaced tobacco curing barn ti indonar ti PMPMI iti BaRang-ay demo-farm itoy nga ili para iti tobacco area ti National Tobacco Administration.
Inyallawat ni Nelson ti nadakamat a proyekto ti kom-pania para iti komunidad bayat ti ibibisitana iti probinsia ti Ilocos Sur idi Pebrero 2.
Kinuna ni Nelson a ti naiyawat a proyekto ket maysa a wagas ti kompania a mangsupapak iti awan sarday a suporta dagiti agmulmula iti tabako iti kompaniada. Innayonna a maysa a teknolohia nga ar-aramaten ti PMPMI iti paktoriada a masarakan iti Sto. Tomas, Batangas ti naipasdek a pugon usar ti C-48 carton.
Segun ken ni Nelson a napimpintas ti pannakaluto dagiti binulong ti tabako itoy a klase ti pugon malaksid a maksayan pay ti gastos dagiti mannalon gapu ta amang a nalaklaka daytoy.
Kinunana a dakkel a banag ti kaadda ti napintas a panawen tapno masigurado ti nangato a kalidad ti tabako sana innayon a maragsakan iti agtultuloy a panangsurot dagiti mannalon kadagiti teknolohia nga isursuro dagiti teknisian ti kompaniada a nangitunda iti idadakkel ti kitada manipud iti mulada a tabako.
“Itultuloyyo ti agmula iti tabako kasta met a denggenyo dagiti balakad dagiti eksperto ket sigurado ti nasayaat a masakbayan ti industria,” kinuna ni Nelson.#