Pannakaprotektar ti Karayan Abra, nairusat

VIGAN CITY – Inrusat ti gobernador ti Ilocos Sur ken ti Abra ti pannakaprotektar ti Karayan Abra tapno malapdan ti pannakaungaw dagiti lames ditoy a pakairamanan ti ludong.

Kinuna ni Gov. Deogracias Victor Savellano a rumbeng laeng a maprotektaran ti Abra River agsipud ta sinalpot daytoy a karayan ti Abra ken Ilocos Sur a pagtataudan ti pagbiag dagiti agindeg nangruna dagiti adda iti asideg daytoy a karayan.

Segun iti maysa a panagadal nga insayangkat ti Saint Louis University a rimmuar iti Northern Luzon Research Journal idi 2007, saanen a maiyataday ti Abra River para iti domestiko a pannakaaramat ta narugit unayen.

Limtuad pay babaen dagiti sample ti danum a naala manipud iti nadumaduma a paglasatan ti Karayan Abra nga awan ti uray ania a porma ti biag kadagiti outlets ti minas ken dam a pakaibellengan dagiti nagminasan ken iti kaadda iti makaalarma a toxic substances kas iti nangato a konsentrasion ti nitrate, dagiti heavy metal a kas iti lead, mercury ken chromium, kasta pay iti kaadda iti cyanide a nangatngato ti konsentrasionna ngem iti accepted limits.

Kanaig daytoy, indauluan Savellano ken ni Abra Gov. Eustaquio Bersamin ti pannakabukel ti Abra River Development Authority itay nabiit para iti pannakaprotektar ti nasao a karayan.

Napanunotantayo daytoy nga aramiden agsipud ta adu a taga-Abra ken Ilocos Sur ti nakadepende ti panagbiagda iti Karayan Abra,” kinuna ni Savellano.

Kinuna met ni Bersamin a suportaranda daytoy a gannuat ti gobernador ti Ilocos Sur.

Maysa a panggep ti ARDA ti pannakasalaknib dagiti lames ditoy a pakairamanan ti ludong a maibilangen a maysa nga endangered specie.

Naammuan nga umabot iti P4,000 kada kilo ti presio ti ludong iti Cagayan ngem P2,000 laeng ditoy Ilocos Sur.

Adda pay (ludong) ngem sumagmamanoda laengen… daytoy ti kayattayo a mapaadu iti Karayan Abra,” kinuna ni Savellano.#