Pannakasukimat makagapu iti landslide, indagadag ti bise gobernador

VIGAN CITY – Kinuna ni Vice Governor Jerry Singson a kasapulanen nga adda umuli iti tuktok ti bantay iti Banaoang, Bantay tapno maammuan no ania ti makagapu iti panagreggaay dagiti bato ken panagayus ti lan-ak nga agpababa.

Daytoy ti reaksion ni Singson gapu iti perhuisio nga impaay ti landslide iti nasao a barangay a nakaro a nangtaktak iti panagbiahe dagiti lugan bayat ti panangduprak ni Bagyo Pepeng iti probinsia iti sumagmamano nga aldaw.

Nagayus ti pitak ken nagtulid dagiti bato manipud iti tuktok ti bantay a nanggabor iti kalsada nasional a sakup ti Banaoang, Bantay ket naserraan ti dalan iti trapiko iti nariwet pay a bigat ti Oktubre 5.

Naluktan ti trapiko kalpasan ti pannakawaknit dagiti bato ken pitak ngem maymaysa a linia ti pagnaan dagiti lugan. Ngem iti panagtuloy ti napigsa a tudo, nagayus manen ti pitak ken nagreggaay dagiti bato gapuna a napaserraan manen iti trapiko iti sumagmamano nga oras.

Uray dagiti simmarsaruno nga aldaw bayat ti panagtalinaed ni Bagyo Pepeng iti Amianan a Luzon, kapilitan a nataktak ti biahe ta nagaboran manen ti kalsada iti pitak ken bato.

Kinuna ni Singson nga apaman a sumayaat ti tiempo, idagadagna ti pannakabuangay ti maysa a team a buklen dagiti nadumaduma nga ahensia a pakaibilangan ti Department of Public Works and Highways, Department of Environment and Natural Resources, Department of Agriculture ken dadduma pay nga ahensia tapno maammuan no ania ti “sipud ken gapuna” iti panagreggaay ti bato ken pitak iti nasao a bantay.

Kinuna ti bise gobernador a suspetsana a makagapu iti landslide ti pannakakalbo ti nasao a bantay gapu iti panagpukan ken panaguging.

Indagadag ni Singson ti pannakamula iti bantay tapno adda mangsarapa iti danum nga agdissuor iti baba.

Kabayatanna, kinuna ni Sangguniang Bayan Member ti Bantay George Leones a ti pannakabungbong ti bantay tapno ma-tunnel para iti proyekto ti irigasion ti suspetsana a gapu ti landslide.

Segun iti konsehal, binungbongda ti bantay iti panagaramidda iti tunnel ket daytoy ti suspetsana a gapu iti reggaay.

Naabutan ti bantay iti nasao a barangay babaen ti Banaoang Pump Irrigation Project ti National Irrigation Administration ket ditoy ti pagnaan ti danum a makunnot iti Abra river a mapan kadagiti kanal a dumanon kadagiti kataltalonan iti sumagmamano nga ili iti umuna a distrito ti probinsia.

“Masapul a kitaenda a nasayaat ta dintokami ket magaburan ditoy Banaoang,” kinuna ni Leones.#