Pasalubong Center, naiyawat iti gunglo dagiti addaan rangkap

CABUGAO, Ilocos Sur – Kas livelihood project ti lokal a gobierno ditoy para kadagiti addaan rangkap, pormal nga inyawat ni Mayor Dio Caesar S. Suero ti Pasalubong Center iti Municipal Organization of Persons with Disabilities (MOPD) idi Oktubre 20.

Naiyawat ti Pasalubong Center kalpasan a napirmaan ti maysa a memorandum of agreement iti nagbaetan ti LGU nga imbagian ti mayor ken ti organisasion dagiti PWDs nga idauluan ni Joel Solis. Masarakan ti nasao a pasdek iti Cabugao Food Court.

Iti pannakikammayet ti gunglo dagiti babbai a Cabugao Ladies Circle (CLC) ken ti Rural Improvement Club (RIC), mailako iti Pasalubong Center dagiti produkto ti CLC ken RIC a mikilunggay ken canton noodles, bibingka a produkto ti Barangay Lipit, cassava cake nga aramid ti Barangay Salomague ken shellcraft ti Barangay Sabang.

Karaman kadagiti dimmar-ay iti programa da SBM Carlito Pano, SBM Marilyn de los Santos, RIC Fededrated President Vicky Serna, dagiti kapitan ti barangay, dagiti miembro ti RIC, CLS, Barangay Nutrition Scholars ken Barangay Health Workers.

Kabayatanna, kalpasan ti makatawen, naan-anay metten a naiyawat iti LGU ditoy ti pannakamanehar ti Stimulation and Therapeutic Action Center (STAC) para kadagiti ubbing nga addaan rangkap a masarakan iti Barangay Rizal Idi Oktubre 10. Naipatakder ti pasdek idi 2008, tinarawidwidan daytoy ti Katipunan ng May Kapansanan sa Pilipinas Inc. (KAMPI) agingga iti pannakaiyawat daytoy iti LGU.

Mainaig itoy, nangilatang ni Mayor Suero iti P500,000 para iti pannakaipataray ti pasdek a mangtaming kadagiti pagkasapulan dagiti ubbing nga addaan rangkap iti ili a Cabugao.#