Pasdek-negosio a mangingato iti presio ti tagilakoda, binallaagan ti DTI

VIGAN CITY – Imballaag ti Department of Trade and Industry a mamulta dagiti pasdek-negosio a mangingato iti presio ti tagilakoda iti sanguanan ti pannakadidigra ti Ilocos Sur iti bagyo.

Impakaammo daytoy ni DTI Provincial Director Grace Lapastura gapu kadagiti pulong a dimmanon kadagiti lokal nga estasion ti radio ditoy a ngimmina ti presio dagiti sumagmamano a basic commodities kadagiti pagtagilakuan iti sumagmamano nga ili iti probinsia.

Kinuna ni DTI provincial director Grace Lapastura nga indeklara ni Pres. Gloria Arroyo nga adda ti Ilocos Sur iti sidong ti kalamidad idi Septiembre 26 babaen ti Proclamation No. 01 a napetsaan iti Septiembre 26 gapu iti didigra nga insangbay ni Bagyo Ondoy ket gapu iti daytoy, agtalinaed ti presio dagiti basic commodities kas iti presioda idi sakbay ti bagyo.

Segun pay ken ni Lapastura sagudayen ti Section 6 ti RA Act 7581 wenno Price Act a no adda ti maysa a probinsia iti babaen ti state of calamity, automatiko nga agtalinaed (freeze) ti presio dagiti basic necessities iti agdama a presioda (prevailing price) agingga iti waswasen ti Presidente ti pammilinna.

Kinuna ti provincial director a bayat ti kaadda ti Ilocos Sur iti babaen ti state of calamity, maipakat ti price control kadagiti basic necessities ket asino man a pasdek-negosio wenno negosiante nga aglabsing iti daytoy ket sumango kadagiti multa kas intuyang ti nasao a linteg.

Indagadag ni Lapastura ti panangireport dagiti aggatang kadagiti pasdek-negosio a mangingato iti presio dagiti tagilakoda a karaman kadagiti basic necessities ket no mapudasdasan a nagsalungasingda, maipakatanda iti multa.

Malaksid iti proklamasion ni Pres. Arroyo nga adda iti estate of calamity ti Metro Manila ken 25 a probinsia a dinidigra ti Bagyo Ondoy a pakairamanan ti Ilocos Sur, naideklara ti intero a Luzon nga adda iti state of calamity gapu iti panangsanot ti Bagyo Pepeng iti Amianan a Luzon.

Nasuroken a 189 ti naireport a natay idinto nga agdagup iti P5 bilion ti nadadael a sanikua, inprastruktura ken iti benneg ti agrikultura gapu iti kinadamsak ni Bagyo Pepeng.#