Phase 2 ti alternate road ti Candon City, narugian

CANDON CITY. Narugian itay nabiit ti pannakasimpa ti alternate road tapno lumukay ti kumarkaro a problema ti trapiko ditoy.

Iti interbio ti DZTP ken ni Engr. Esteban Martinez, city engineer ditoy siudad, kinunana a napunduan ti nasao a proyekto iti P20 milion babaen ti initiatibo ni House Deputy Speaker Eric Singson.

Kinuna ni Martinez a karaman ti proyekto ti pannakasimpa ken pannakailawa ti kalsada a lumasat iti Dappat bridge.

Maipalawa ken masimpa ti kalsada a mangrugi iti Barangay San Agustin sa agdalan iti 25 de Marzo street iti Barangay San Antonio agingga iti Barangay San Isidro sa iti kalsada a tumupar iti opisina ti DPWH,” kinuna ni Martinez.

Nupay kasta, kinuna ti inhiniero a saan a marebba ti nasao a rangtay a naipatakder idi tiempo dagiti Kastila agsipud ta dakkel ti pasetna iti pakasaritaan daytoy a siudad.

Maipalagip nga adda proposal a diversion road ti Candon City, ngem awanan pay laeng daytoy iti pondo gapuna a daytoy alternate road pay laeng ti simsimpaenda tapno lumukay ti trapiko iti poblacion area.#